މިދިޔަ މާޗް މަހުން ފެށިގެން އޮލިމްޕަހުގައި ދައްކަމުން އަންނަ ފިލްމު "ލަސްވިޔަސް" ގެ ޝޯތައް އަންނަ ހުކުރު ދުވަހުގެ ރޭ ނިންމައިލަން ތައްޔާރުވެއްޖެ އެވެ.

މުހައްމަދު ނިޔާޒު (ޓެޑްރީ) ލިޔެ، ޑައިރެކްޓްކޮށް ގެނެސްދިން މި އަސަރު ގަދަ ލޯބީގެ ފިލްމު ޕްރީމިއާކުރީ މާޗް 12 ގަ އެވެ. އޭގެ ފަހުން "ލަސްވިޔަސް" ގެ ޝޯތައް ދައްކަމުން އަންނަ އިރު، މި ފިލްމުވެފައި އެޅުވި ފަހުން މެދިކެނޑުމެއް ނެތި އޮލިމްޕަހުގައި އެންމެ ގިނަ ދުވަހު ދެއްކި ފުރަތަމަ ދިވެހި ފިލްމަށެވެ.

މި ފިލްމަކީ ޓެޑްރީގެ ފުރަތަމަ ފިލްމު 1994 ގެ "ދެރިޔާ" އަށް 30 އަހަރު ފަހުން، އޭނަ ޑައިރެކްޓްކޮށް ގެނެސްދިން ދެވަނަ ފިލްމަށްވާތީ މިއަށް ގިނަ ބަޔަކު ދިޔައީ ވަރަށް ބޮޑަށް އިންތިޒާރު ވެސް ކުރަމުންނެވެ.

އޭނަގެ އިޓާނަލް ޕިކްޗާސް އިން ގެނެސްދިން "ލަސްވިޔަސް" ގެ މައިގަނޑު ކާސްޓްގައި ހިމެނެނީ އަހުމަދު އީސަ (އާނަންދު) އާއި ވާޝިޔާ މުހައްމަދެވެ.

މި ފިލްމަކީ މި އަހަރު އޮލިމްޕަހުގައި އެޅުވި ފަސް ވަނަ ފިލްމެވެ.