ވީއައިއޭ ތަރައްގީ ކުރަން ސައޫދީ ފަންޑުން އިތުރު 17 މިލިއަން ޑޮލަރު

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ތަރައްގީގެ މަޝްރޫއަށް ސައުދީ ފަންޑް ފޯ ޑިވެލޮޕްމެންޓުން 63.7 މިލިއަން ސައުދީ ރިޔާލް، ނުވަތަ 17 މިލިއަން ޑޮލަރުގެ ލޯނެއް ދީފި އެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ. އަދި، ސައުދީ ފަންޑުގެ ފަރާތުން ސޮއިކުރެއްވީ އެ ފަންޑުގެ ސީއީއޯ ސުލްތާން ބިން އަބްދުއްރަހުމާން އަލްމުރްޝިދެވެ.

ރައީސް އޮފީހުން ބުނީ އެއަޕޯޓް ތަރައްގީ ކުރުމުގެ މަޝްރޫއު ހަމަޖެހިގެން ދިޔަ އިތުރު މާލީއެހީގެ ސަބަބުން މި މަޝްރޫއުގެ މަސައްކަތް އަވަހަށް ނިންމުމުގެ ޔަގީންކަން ލިބިގެންދާނެ ކަމަށެވެ.

އަދި މި މަޝްރޫއު ނިމުމާއިއެކު، ރާއްޖެއަށް އިގުތިސާދީ ގޮތުން ގިނަގުނަ ފައިދާތަކެއް ލިބިގެންދާނެ ކަމަށާއި އެ ގޮތުން ފަތުރުވެރިންނަށާއި އިތުރު އެއާލައިން ތަކަށް ޖާގަ ލިބި، ފަތުރުވެރި ކަމާއި، ވިޔަފާރި އާއި ދަތުރުފަތުރު ފަދަ އިގުތިސާދީ ތަރައްގީ އާ ގުޅުންހުރި ސިނާއަތް ތަކަށް އިތުރު ކުރިއެރުން ލިބިގެންދާނެ ކަމަށް ރައީސް އޮފީހުން ބުންޏެވެ.

އަދި މިކަމުގެ ސަބަބުން ގައުމީ އުފެއްދުންތެރި ކަމުގައި އެންމެ އިސްދައުރެއް އަދާކުރާ ފަތުރުވެރި ކަމުގެ ސިނާއަތަށް ބޮޑެތި ކުރިއެރުންތަކެއް ލިބިގެންދާނެ ކަން ވެސް އެ އޮފީހުން ބުނެ އެވެ.

ރައީސް އޮފީސް ސައުދީ އަރަބިޔާ