މަޑުލުވަހީދަކީ، ދިވެހިބަހުގެ އަދީބެއް، ތާރީހު ދުށް ކުޅަދާނަ ލިޔުންތެރިއެއް: ރައީސް

މަޑުލު މުޙައްމަދު ވަހީދަކީ، ދިވެހިބަހުގެ އަދީބެއްގެ އިތުރުން ދިވެހިރާއްޖޭގެ ފަހުގެ ތާރީގު ދުށް ކުޅަދާނަ ލިޔުންތެރިއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ ދިވެހި ބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު މަޑުލު މުޙައްމަދު ވަހީދު އަވަހާރަވި ހަބަރު އެހީ ފުން ހިތާމައާއި އެކުގައި ކަމަށެވެ.

"މަރުހޫމް މަޑުލު މުޙައްމަދު ވަހީދަކީ، ދިވެހިބަހުގެ އަދީބެއް، ދިވެހިރާއްޖޭގެ ފަހުގެ ތާރީހު ދުށް ކުޅަދާނަ ލިޔުންތެރިއެއް، ތަރުޖަމާ ކުރުންތެރިއެއް، އެންމެ ފަހު ވަގުތާ ޖެހެންދެން ވެސް ހިދުމަތުގައި ދެމި ހުންނެވި ފަރުވާތެރި ހިދުމަތްތެރިއެއް،" ރައީސް ވިދާޅުވި އެވެ.

މަޑުލުވަހީދަށް ލިބިލައްވާފައިވާ ބައެއް ކާމިޔާބީތައް ފާހަގަ ކުރައްވަމުން ރައީސް ވިދާޅުވީ އެގޮތުން ލިޔުންތެރި ކަމަށް ހިދުމަތް ކުރުމުގެ ރޮނގުން 1985 ވަނަ އަހަރު އާންމު ހިދުމަތަށް ހިތްވަރު ދިނުމުގެ އިނާމު ލިބިވަޑައިގެންފައިވާ ކަމަށާއި ކުރުވާހަކަ ލިޔުމުގެ ރޮނގުން 1997 ވަނަ އަހަރު އާންމު ހިދުމަތަށް ހިތްވަރު ދިނުމުގެ އިނާމު ލިބިވަޑައިގެންފައިވެ އެވެ.

އޭގެ އިތުރުން ދިވެހިބަހާއި އަދަބިއްޔާތުގެ ދާއިރާއިން ދިވެހި ބަހުގެ ލިޔުންތެރިކަން ކުރި އެރުވުމުގެ ރޮނގުން 2019 ވަނަ އަހަރު ޝަރަފުވެރި ކަމުގެ އިނާމު ހާސިލު ކުރެއްވުމާއި އަދި ދިވެހި ނޫސްވެރި ކަމުގެ އަލިމަސް ގަލަން ވެސް ވަހީދަށް ލިބިވަޑައިގެންފައިވާ ކަމަށް ރައީސް ވިދާޅުވި އެވެ.

"ގިނަ ދަރިވަރުން ތަކަކަށް ކިޔަވައި ދެއްވާފައި ވޭ، ބައި ގަރުނަށް ވުރެ ދިގު މުއްދަތަކު ގައުމަށް އެ ކޮށްދެއްވި އަގުހުރި ހިދުމަތުގެ ޒިކުރާ ފަނޑުވުމެއް ނެތި ދެމިހުންނާނެ،" ރައީސް ވިދާޅުވި އެވެ.

ރައީސްގެ ޕޯސްޓުގައި ނިންމަވާލައްވާފައި ވަނީ މަރުހޫމް މަޑުލު މުޙައްމަދު ވަހީދުގެ ފުރާނަފުޅަށް ސުވަރުގޭގެ މަތިވެރި ނިއުމަތް މާތްﷲ މިންވަރު ކުރައްވާ، އާއިލާއަށް ކެތްތެރިކަން ދެއްވުން އެދި ދުއާ ކުރައްވަމުންނެވެ.

އުމުރުން 77 އަހަރުގައި މަޑުލު މުޙައްމަދު ވަހީދު އަވަހާރަވީ އައިޖީއެމްއެޗުގައި ފަރުވާ ދެމުންދަނިކޮށެވެ.