އެއާޕޯޓުގެ ހަޔާތުގައި ކުރިއަށް އޮތީ ތަރައްގީގެ އަހަރެއް: ޝަރީފް

އެމްއޭސީއެލްގެ ސީއީއޯ އަދި މެނޭޖިން ޑައިރެކްޓަރު އިބްރާހީމް ޝަރީފް —

ވެލާނާ އިންޓަނޭޝަނަލް އެއާޕޯޓް (ވީއައިއޭގެ) ހަޔާތުގައި ކުރިއަށް އޮތީ ތަރައްގީގެ އަހަރެއް ކަމަށް އެމްއޭސީއެލްގެ ސީއީއޯ އަދި މެނޭޖިން ޑައިރެކްޓަރު އިބްރާހީމް ޝަރީފް ވިދާޅުވެއްޖެ އެވެ.

ޝަރީފް މިހެން ވިދާޅުވީ ވީއައިއޭގެ 59 ވަނަ އަހަރީ ދުވަސް ފާހަގަ ކުރުމަށް މިއަދު ރަސްމިއްޔާތުގައި ވާހަކަ ދައްކަވަމުންނެވެ.

އަހަރީ ދުވަހުގެ މުނާސަބަތުގައި އެންމެ ފުރަތަމަ ބާއްވާފައި ވަނީ ދިދަ ނެގުމުގެ ރަސްމިއްޔާތެކެވެ.

އެއާޕޯޓުގެ ތަރައްގީ އަށް ވަރަށް މުހިއްމު ބޮޑެތި މަޝްރޫއުތައް ހިނގަމުންދާ ކަން ފާހަގަ ކުރައްވައި ޝަރީފް ވިދާޅުވީ ކޮންޓްރެކްޓަރުން ނިންމާނީ ފެސިލިޓީސް ކަމަށާއި އެ ތަންތަން އޮޕަރޭޝަނަލައިޒްކޮށް، ގައުމަށް އޭގެ ފައިދާ ހޯދައިދޭން ތިބީ މުވައްޒަފުން ކަމަށެވެ.

އެ ގޮތުން އެއާޕޯޓުގެ މުވައްޒަފުންނަކީ އަބަދުވެސް ގައުމަށް ޓަކައި އަގު ހުރި ހިދުމަތް ތަކެއް ކުރާ ބައެއްކަން ފާހަގަ ކުރައްވައި ޝަރީފް ވަނީ އެކަމަށް ޓަކައި މުވައްޒަފުންނަށް ޝުކުރު އަދާކުރައްވާފަ އެވެ.

ވީއައިއޭގެ ހަޔާތުގައި ކުރިޔަށް އޮތް އަހަރަކީ ހިދުމަތްތައް ވަރަށް ބޮޑަށް ތަރައްގީ ވެގެން ދާނެ އަހަރެއްކަން ފާހަގަ ކުރައްވައި ޝަރީފް ވިދާޅުވީ ސްޓޭކްހޯލްޑަރުންނާއި، ފަސިންޖަރުން އުފާވާ ފަދަ ހިދުމަތް ތަކެއް އެއާޕޯޓުން ދޭން މަސައްކަތް ކުރަން ޖެހޭ ކަމަށެވެ.

އެމްއޭސީއެލް