ބަންދުގައި ބަހައްޓައިގެން ކޯޓަށް ހާޒިރުކުރަން 2 މީހަކު ހޯދަނީ

ފުލުހުން ހޯދަން އިއުލާންކުރި ދެ މީހުން --

ބަންދުގައި ބަހައްޓައިގެން ކޯޓަށް ހާޒިރު ކުރަން 2 މީހަކު ހޯދަން ފުލުހުން އިއުލާން ކޮށްފި އެވެ.

ފުލުހުން ބުނީ ކްރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރު ކުރަން ބޭނުންވެ ހާޒިރު ކުރެވިފައި ނުވާ ދެ މީހަކު ބަންދުގައި ބަހައްޓައިގެން ކޯޓަށް ހާޒިރު ކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން އެ މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.

މި އަމުރުތަކާ ގުޅިގެން ހޯދަނީ ލ. މާބައިދޫ ކަނީރުވިލާ، މުޙައްމަދު ހައްސާން، 31، އާއި ދަފުތަރު ނަންބަރު ރސ 5624 / މާލެ، އަހުމަދު ޝައިރަފް އަބްދުއްރަހީމް، 30 އެވެ.

ހައްސާން އާއި ޝައިރަފް، ހޯދަމުން އަންނަނީ އެ މީހުންގެ މައްޗަށް ހުށަހަޅާފައިވާ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ މައްސަލައެއްގަ އެވެ.

މި ދެ މީހުންގެ ތެރެއިން ހައްސާން ކޯޓަށް ހާޒިރު ކުރަން ޖެހެނީ މާދަމާ ހެނދުނު 10:30 އަށެވެ. ޝައިރަފް ހާޒިރު ކުރަން ޖެހެނީ މާދަމާ 13:00 އަށެވެ.

އެހެންކަމުން، އެ މީހުންނާ ބެހޭ އެއްވެސް މައުލޫމާތެއް ލިބިފައިވާ މީހަކު ވާނަމަ ފުލުހުންގެ ކަސްޓޯޑިއަލް ނަންބަރު 9991442އަށް ގުޅައި ހިއްސާ ކޮށްދިނުމަށް ފުލުހުން ވަނީ އެދިފަ އެވެ.

ފުލުހުން