ކިޔަވައިދޭ ކޮންޓެންޓުގެ ފެންވަރު ރަނގަޅު ކުރަން ހާއްސަ އިސްކަމެއް ދޭނަން: ޝަފީއު

އެޑިއުކޭޝަން މިނިސްޓަރު އިސްމާއީލް ޝަފީއު --

ކިޔަވައިދޭ ކޮންޓެންޓްގެ ފެންވަރު ރަނގަޅު ކުރުމަށް ހާއްސަ އިސްކަމެއް ދޭނެ ކަމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.

ދިރާސީ އައު އަހަރު ފެށުމުގެ މުނާސަބަތުގައި ދެއްވި މިއަދު ހިތާބުގައި މިނިސްޓަރު ވިދާޅުވީ މި ފެށުނު ދިރާސީ އަހަރުގެ ތެރޭގައި އެންމެ ހާއްސަ އިސްކަމެއް ދީގެން ކުރިއަށް ގެންދާނެ މަސައްކަތަކީ ދަރިވަރުންނަށް އުނގަންނައިދެވޭ ކޮންޓެންޓްގެ ފެންވަރު ރަގަޅު ކުރުން ކަމަށެވެ.

މިނިސްޓަރު ވިދާޅުވީ ކިޔަވައިދޭ ކޮންޓެންޓްގެ ފެންވަރު އިތުރަށް ރަނގަޅު ކުރުމަށް ޓަކައި ވަކި ވަކި މާއްދާ ތަކުގެ މުގައްރަރުތައް އަލުން މުރާޖައާކޮށް، ކޮންމެހެން ގެންނާން ޖެހޭ ބަދަލުތައް ގެނައުމުގެ މަސައްކަތްތައް މިހާރު ކުރިއަށް ދާނެ ކަމަށެވެ.

މީގެ އިތުރުން ދާއިރާގެ އިލްމާއި ތަޖުރިބާ ލިބިފައިވާ މުދައްރިސުންނާއި ފަންނީ ތަޖުރިބާކާރުންގެ އެހީތެރިކަމާ އެކު، ކީ ސްޓޭޖް ހަތަރެއްގެ މާއްދާ ތަކުގެ ޓެކްސްޓް ފޮތް ތަކާއި މަސައްކަތު ފޮތް ތަކާއި، ޑިޖިޓަލް ކޮންޓެންޓު އެކުލަވާލުމުގެ އަމަލީ މަސައްކަތް ވެސް މި އަހަރުގެ ތެރޭގައި ފެށިގެން ކުރިއަށް ދާނެ ކަން މިނިސްޓަރު ޝަފީއު ފާހަގަ ކުރެއްވި އެވެ.

ބޮޑު ޗުއްޓީއަށްފަހު ދިރާސީ އައު އަހަރުގެ ކިޔެވުން މިއަދު ރާއްޖޭގެ ހުރިހާ ސުކޫލެއްގައި ވަނީ ފަށާފަ އެވެ.

އެޑިއުކޭޝަން މިނިސްޓްރީން ބުނީ ރާއްޖޭގެ 217 ސުކޫލެއްގައި ޕްރީސްކޫލް އިން ފަށައިގެން ގްރޭޑް 12އާ ހަމައަށް 90،000 އެއްހާ ދަރިވަރުން މި އަހަރު ތައުލީމް ހާސިލް ކުރާ ކަމަށެވެ.

އެޑިއުކޭޝަން މިނިސްޓްރީ