ދިރާސީ އައު އަހަރުގެ ކިޔެވުން މިއަދު ފަށައިފި

ބޮޑު ޗުއްޓީއަށްފަހު ދިރާސީ އައު އަހަރުގެ ކިޔެވުން މިއަދު ރާއްޖޭގެ ހުރިހާ ސުކޫލެއްގައި ފަށައިފި އެވެ.

އެޑިއުކޭޝަން މިނިސްޓްރީން ބުނީ ރާއްޖޭގެ 217 ސުކޫލެއްގައި ޕްރީސްކޫލް އިން ފަށައިގެން ގްރޭޑް 12އާ ހަމައަށް 90،000 އެއްހާ ދަރިވަރުން މިއަހަރު ތައުލީމް ހާސިލް ކުރާ ކަމަށެވެ.

މީގެ އިތުރުން 5000 އެއްހާ ދަރިވަރުން މި އަހަރު އަލަށް ގްރޭޑް އެކަކަށް ވައްދައިފައިވާ ކަމަށާއި އޭގެ ތެރެއިން 2000 އެއްހާ ދަރިވަރުންނަކީ މާލެ ސަރަހައްދުގެ ސްކޫލް ތަކަށް އަލަށް ވައްދައިފައިވާ ކުދިން ކަމަށް ވެސް މިނިސްޓްރީން ބުންޏެވެ.

ގިނަ ބަދަލު ތަކަކަށްފަހު، އެޑިއުކޭޝަން މިނިސްޓްރީން އާންމު ކުރި އެކަޑަމިކް ކަލަންޑަރުގައިވާ ގޮތުން ފުރަތަމަ ޓާމުގައި ޗުއްޓީއަށް ދަރިވަރުން ދާނީ ޖުލައި 24ގަ އެވެ. އަދި ދެ ވަނަ ޓާމުގެ ކިޔެވުން ފަށާނީ އޮގަސްޓު ދިހައެއްގަ އެވެ.

މި ދިރާސީ އަހަރުގެ ބޮޑު ޗުއްޓީ ފަށާނީ ޑިސެމްބަރު 28 ގައެވެ. 2026 ވަނަ އަހަރުގެ ޖެނުއަރީ 27 އަކީ އަންނަ އަހަރުގެ ކިޔެވުން ފެށުމަށް އެކަޑަމިކް ކަލަންޑަރުގައި ކަނޑައަޅައިފައިވާ ދުވަހެވެ.

މިދިޔަ އަހަރުގެ ކިޔެވުން ނިންމުމަށް ފަހު ދަރިވަރުންނާއި މުދައްރިސުން ބޮޑު ޗުއްޓީ އަށް ދިޔައީ ފެބްރުއަރީ 27 ގަ އެވެ. ރޯދަ އާއި އީދު ބަންދާއެކު ބޮޑު ޗުއްޓީއަށް 38 ދުވަސް ބަންދުކޮށް ދަރިވަރުންނަށް ލިބިފައިވެ އެވެ.

އެޑިއުކޭޝަން މިނިސްޓްރީ