ޖޭއެސްސީގެ މެންބަރު ކަމަށް ޝަހީދު، އައްޔަންކުރައްވައިފި

ޖޭއެސްސީގެ މެންބަރު ކަމަށް ޝަހީދު އައްޔަން ކުރެއްވުން --

ރައީސް ޑރ. މުޙައްމަދު މުއިއްޒު، ޖުޑީޝަލް ސާވިސް ކޮމިޝަންގެ މެންބަރު ކަމަށް ސުޕްރީމް ކޯޓުގެ ފަނޑިޔާރު ސ. ހިތަދޫ، ބާޒީގެ ހުސައިން ޝަހީދު، މިއަދު އައްޔަނު ކުރައްވައިފި އެވެ.

ސުޕްރީމް ކޯޓުގެ ފަނޑިޔާރު ޝަހީދު، ޖޭއެސްސީގެ މެންބަރު ކަމަށް އައްޔަނު ކުރެއްވީ ޖުޑީޝަލް ސާވިސް ކޮމިޝަނުގެ ގާނޫނުގައި ބަޔާންކޮށްފައިވާ ގޮތުގެ މަތިން، ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ އުއްތަމަފަނޑިޔާރު ފިޔަވައި އެހެން ފަނޑިޔާރެއްގެ ހައިސިއްޔަތުންނެވެ.

ޖޭއެސްސީގެ މެންބަރު ކަމަށް އައްޔަނު ކުރެއްވުމުގެ ކުރިން، ޝަހީދު، ވަނީ، ޖުޑީޝަލް ސާވިސް ކޮމިޝަންގެ މެންބަރު ކަމުގެ ހުވައި، ރައީސުލްޖުމްހޫރިއްޔާގެ ކުރިފުޅުމަތީގައި ކުރައްވާފަ އެވެ. ހުވައި ލައިދެއްވީ، ސުޕްރީމް ކޯޓުގެފަނޑިޔާރު ޑރ. މުޙައްމަދު އިބްރާހީމެވެ. އަދި ހުވައިގެ އިގުރާރުގައި ޝަހީދު، ވަނީ ސޮއިކުރައްވާފަ އެވެ.

މި ރަސްމިއްޔާތުގައި ޖޭއެސްސީގެ މެންބަރު ކަމަށް އައްޔަން ކުރެއްވި ކަމުގެ ލިޔުން، ހުސައިން ޝަހީދާ ހަވާލު ކޮށްދެއްވީ ރައީސުލްޖުމްހޫރިއްޔާ އެވެ.

ހުސައިން ޝަހީދަކީ، ހައި ކޯޓުގެ އިސް ފަނޑިޔާރުގެ މަގާމާއި، ކްރިމިނަލް ކޯޓުގެ ފަނޑިޔާރު ކަމުގެ މަގާމު ވެސް އަދާ ކުރައްވާފައިވާ ބޭފުޅެކެވެ.

ޝަހީދު ވަނީ، މާސްޓާ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ، އަދި ޖޫރިސްޕްރޫޑަންސް އެންޑްލޯ، އެލްއެލްބީ ހާސިލު ކުރައްވާފަ އެވެ.

ރައީސް ޑރ މުޢިއްޒު