ދުންފަތް މަނާކުރާ އުމުރު ކަނޑައަޅަން އާންމުންގެ ހިޔާލަށް ހުޅުވާލައިފި

ޒުވާން ޖީލު ދުންފަތާ ދުރު ކުރުމަށް އެކަށައަޅުއްވާފައިވާ ޖެނެރޭޝަނަލް ބޭން ކަނޑައަޅާނޭ ގޮތާމެދު ރައްޔިތުންގެ ހިޔާލު ހޯދުމަށް، ރައީސް ޑރ. މުޙައްމަދު މުއިއްޒު ޕޯލެއް ހުޅުވާލައްވައިފި އެވެ.

މިއަދު ހުޅުވާލި މި ޕޯލަކީ، ރައީސަކު ދައުރުގެ ތެރޭގައި، މުހިންމު ނިންމެވުމަކާ ބެހޭގޮތުން ރައްޔިތުންގެ ހިޔާލު ހޯދުމަށް، މީސް މީޑިއާ މެދުވެރިކޮށް، ހުޅުވާލި މި ފަދަ ފުރަތަމަ ޕޯލެވެ.

އެ މަނިކުފާނުގެ ރަސްމީ "އެކްސް" އެކައުންޓުން ހުޅުވާލައްވާފައިވާ ޕޯލްގައި ވަނީ، ޖެނެރޭޝަނަލް ބޭން ކަނޑައެޅުއްވުމުގައި އެ މަނިކުފާނު ހުށައަޅުއްވާ ގޮތްތައް ހިއްސާ ކުރައްވާފަ އެވެ. އެ ގޮތުން އެ މަނިކުފާނު ހުށައަޅުއްވާ ގޮތް ތަކުގެ ތެރެއިން ގޮތެއް އިހުތިޔާރު ކުރެއްވުމަށް ޕޯލްގައި ވަނީ އެދިވަޑައިގެންފަ އެވެ.

ރައީސް ހުށައަޅުއްވާ ގޮތް ތަކަކީ:

2007 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

2004 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

2000 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

ރައްޔިތުންގެ ސުވާލު ތަކަށް ޖަވާބުދެއްވުމަށް ރައީސް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅުދައްކަވަމުން، މި ހިނގާ އެޕްރިލް މަހުގެ 2 ވަނަ ދުވަހު ރައީސުލްޖުމްހޫރިއްޔާ ވަނީ، މި ކަމާ ގުޅޭ ކެބިނެޓް ކަރުދާސް ތައްޔާރު ކުރެއްވުމުގައި ކަމާގުޅޭ ފަރާތް ތަކުގެ ތެރޭގައި ހިމެނިވަޑައިގަންނަވާ ޑޮކްޓަރުންނާއި، އަދި ވެސް އެނޫން ވެސް ފަރާތް ތަކުގެ މަޝްވަރާ ވެސް ހޯއްދަވަން އިރުޝާދު ދެއްވާފައިވާ ވާނެ ކަމަށް ވިދާޅުވެފަ އެވެ.

ޕޯލަށް ހުޅުވާލެއްވި ތިން ގޮތް ހުށައެޅުއްވުމުގެ ހިކުމަތަކީ، 18 އަހަރާއި 25 އަހަރާ ދެމެދުގެ އުމުރުފުރާގެ މީހުން، ނުވަތަ ޒުވާނުން އެ ކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެ ކަމުގައި ވާތީ ކަމަށް ވެސް، ރައީސުލްޖުމްހޫރިއްޔާ ވިދާޅުވެފައިވެ އެވެ.