ދުންފަތުގެ ވިޔަފާރިކުރާ ފަރާތްތައް، އެ ވިޔަފާރި ދޫކޮށްލަން ރައީސް ގޮވާލައްވައިފި

ދުންފަތުގެ ވިޔަފާރިކުރާ ފަރާތްތަކުން، އެ ވިޔަފާރި ދޫކޮށްލަން ރައީސް ޑރ. މުޙައްމަދު މުއިއްޒު ގޮވައިލައްވައިފި އެވެ.

އެ މަނިކުފާނު މިކަމަށް ގޮވައިލެއްވީ "ރައްޔިތުންނާ އެކު" މި ނަމުގައި ރައީސުލްޖުމްހޫރިއްޔާގެ އޮފީހުން ފަށައިގެން ކުރިއަށް ގެންދާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ ދުންފަތުގެ ބާވަތް ތަކުގެ އަގު ބޮޑު ކުރުމުގެ މައިގަނޑު މަފްހޫމަކީ އެކަމުން ރައްޔިތުން ސަލާމަތް ކުރުން ކަމަށާއި އެކަމަކީ ފަހަރަކު ތަންކޮޅެއް ޓެކްސް ބޮޑުކޮށްގެން ވާނެ ކަމެއް ނޫން ކަމަށެވެ. އަދި އެހެން އެކަން ކޮށްފި ނަމަ އެއީ ސިނގިރޭޓު އެތެރެ ކުރާ މީހުންނަށް އެއިން ބޮޑުވާބައި ހަމަޖައްސައިގެން، ވިއްކަމުންދާން ލިބޭނެ ފުރުސަތެއްގެ ގޮތުގައި އެ މަނިކުފާނު ފާހަގަ ކުރެއްވި އެވެ.

ރައީސް ވިދާޅުވީ ހާއްސަކޮށް ޅަދަރީންނާއި ތުއްތުކުދިން އެ ނުރަނގަޅު އާދައިގެ ތެރެއަށް ދާން ދޫކޮށްލައިގެން ސަރުކާރެއް އޮންނާންވީ ސަބަބެއް އެ މަނިކުފާނަށް ވިސްނިވަޑައި ނުގަންނަވާ ކަމަށެވެ. އަދި އެހެން ގައުމުތަކުގައި ވެސް ވާހެން ރާއްޖޭގައި ވެސް ޒުވާން ކުދީން ދުންފަތުގެ އިސްތިއުމާލުގެ ތެރެއަށް ގޮސް ދެން އެއިން ސަލާމަތް ނުވެގެން އުޅެންޖެހޭ މަންޒަރު ފެންނާތީ ހިތާމަ ކުރައްވާ ކަމަށް ވެސް ވިދާޅުވި އެވެ.

"އަޅުގަނޑު އެދެން ސިނގިރޭޓު އެތެރެކޮށް، ސިނގިރެޓު ވިޔަފާރި ކުރާ މީހުން އެ ވިޔަފާރި ދޫކޮށްލަން، އެހެން ކަމަކައިގެން އުޅެން، މީކީ ކުރާވަރު ކަމެއް ނޫން، މިއީ ކުޑަކުޑަ ގައުމެއް، މިލިއަނުން މިލިއަނުން މީހުން އުޅޭ ތަނެއް ނޫން، ކީއްކުރަން މިތަނުގައި އެކަން ކުރަންވީ، އަޅުގަނޑުމެންގެ މި ކުޑަ މުޖުތަމައު މިކަމުން ސަލާމަތް ކުރިއްޔާ މާ ރަނގަޅު ނޫންތޯ،" ރައީސް ވިދާޅުވި އެވެ.