އަންނަ އަހަރުގެ ނިޔަލަށް ކޮންމެ ރަށެއްގައި އައުޓްޑޯ ޖިމެއް ގާއިމު ކުރަނީ

ބީއެމްއެލްގެ އެހީގައި ހދ. ކުރިނބީގައި ހަދާފައިވާ އައުޓް ޑޯ ޖިމް -- ފޮޓޯ/ ބީއެމްއެލް

އަންނަ އަހަރުގެ ނިޔަލަށް ކޮންމެ ރަށެއްގައި ވެސް އައުޓްޑޯ ޖިމެއް ގާއިމު ކުރެވޭނެ ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިކަން ހާމަ ކުރެއްވީ "ރައްޔިތުންނާ އެކު" މި ނަމުގައި ރައީސުލްޖުމްހޫރިއްޔާގެ އޮފީހުން ފަށައިގެން ކުރިއަށް ގެންދާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅު ދައްކަވަމުންނެވެ.

ރައީސް ވަނީ އައުޓްޑޯ ޖިމްގެ އިތުރުން ކުޑަކުދީން ވެސް ބޭރަށް ނުކުމެ ހަރަކާތްތެރިވެ އުޅުމަށާއި، އާއިލާއާއެކު ވަގުތު ހޭދަކޮށްލުމަށް، ކުޑަކުދީންގެ ޕާކްތައް ހަދަމުންދާކަން ވެސް ފާހަގަ ކުރައްވާފަ އެވެ. ވިދާޅުވީ އެ ކަމުގެ ސަބަބުން ސިކުނޑިއަށް ވެސް ހަމަޖެހުން ލިބިގެންދާނެ ކަމަށެވެ.

އޭގެ އިތުރުން މި މަސައްކަތުގެ ތެރެއިން މާލޭގެ ހަލާކުވެފައިވާ ޕާކުތައް މަރާމާތު ކުރުމަށް ނިންމާފައިވާ ކަމަށް ވެސް ރައީސް ވިދާޅުވި އެވެ. އަދި ސަލްޓަން ޕާކް މަރާމާތު ކުރުމަށް ކުރައްވާނެ މަސައްކަތްތަކުގެ ތަފުސީލީ މައުލޫމާތު ވެސް އެ މަނިކުފާނު ވަނީ ހިއްސާ ކުރައްވާފަ އެވެ. މި ގޮތުން އެ ޕާކް ތަރައްގީ ކުރައްވާނީ "އެޑްވެންޗަރަސް" ކަންކަން ހިމަނައިގެން ކަމުގައި ވިދާޅުވި އެވެ.

ރައީސް ވިދާޅުވީ ސަރުކާރުން ހިންގާ ކުޅިވަރާ ގުޅުންހުރި މަޝްރޫއުތައް ހިންގަނީވެސް "ޕްރިވެންޓިވް ހެލްތު ކެއާ"އަށް މަގުފަހި ކުރުމުގެ މަގުސަދު ހާސިލު ކުރެވޭނެ ގޮތަށް ކަމަށެވެ.

ރައީސް ޑރ މުޢިއްޒު