އައްޑޫ ކަރަންޓު މައްސަލަ: 1.8 މެގަވޮޓްގެ އިތުރު ޖަނަރޭޓަރެއް ފޮނުވައިފި

އައްޑޫއަށް އިތުރު ޖަނަރޭޓަރެއް ފޮނުވުމުގެ މަސައްކަތް ކުރަނީ -- ފެނަކަ ފޮޓޯ

އައްޑޫ ސިޓީން ކަރަންޓު ކެނޑޭ މައްސަލަ ހައްލު ކުރުމަށް ކުރަމުންދާ މަސައްކަތުގެ ތެރެއިން އެ ސިޓީއަށް އިތުރު ޖަނަރޭޓަރެއް ފޮނުވައިފި އެވެ.

އައްޑޫއަށް ކަރަންޓު ފޯރުކޮށްދެނީ ފެނަކައިންނެވެ. އައްޑޫގައި 18 ވަރަކަށް ޖަނަރޭޓަރު ބަހައްޓައިގެން ކަރަންޓުގެ ހިދުމަތް ދެމުންދާއިރު ވެސް އެ ސިޓީން ދޭތެރެ ދޭތެރެއިން ކަރަންޓު ކަނޑާލަން ޖެހެ އެވެ. މި މައްސަލަ ދިމާވަނީ ޖަނަރޭޓަރުތައް ރަނގަޅަށް އޯވަހޯލް ނުކޮށް ގިނަ އަހަރު ތަކެއް ވުމުން އެ ޖަނަރޭޓަރު ތަކުގެ ހާލަތު ވަރަށް ބޮޑަށް ދަށަށް ގޮސްގެންނެވެ.

ފެނަކައިން މީޑިއާއަށް މައުލޫމާތު ދެމުން ވަނީ 1.8 މެގަވޮޓްގެ ޖަނަރޭޓަރެއް މިއަދު ހެނދުނު އައްޑޫއަށް ފޮނުވާފައިވާ ކަމަށާއި މާދަމާގެ ވަތުތެއްގައި އެ ޖަނަރޭޓަރު އައްޑޫ ސިޓީއާ ހަމައަށް ފޯރާނެ ކަމަށެވެ.

އައްޑޫއަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ހޯދުމަށް މި ސަރުކާރުން ކެނޑިނޭޅި ކުރަމުން އަންނަ މަސައްކަތުގެ ތެރެއިން މިދިޔަ އަހަރު ވަނީ ޗައިނާގެޑޮންފަންގް އިލެކްޓްރިކް ކޯޕަރޭޝަނާ ހަވާލު ކޮށްފަ އެވެ. އެ ކުންފުންޏާ ހަވާލު ކުރީ 32 މެގަވޮޓުގެ ޕަވާ ޕުލާންޓަކާއެކު ޑިސްޓްރިބިއުޝަން ސިސްޓަމް އަޕްގްރޭޑު ކުރުމެވެ.

ފެނަކައިން ބުނެފައިވާ ގޮތުގައި އެ މަޝްރޫއު އެއްކޮށް ނިމުމުން އައްޑޫން ކަރަންޓު ކެނޑޭ މައްސަލައަށް ދާއިމީ ހައްލެއް ކުރިއަށް އޮތް 20 ވަރަކަށް އަހަރަށް ލިބޭ އެވެ.

ފެނަކަ