މެޑިސިން ކިޔަވާ ދަރިވަރުން، އިންޓާންޝިޕް ހެދުމަށް ހުރި ދަތިތައް ހައްލުކޮށްފި

މެޑިސިން ކިޔަވާ ދަރިވަރުންނަށް އިންޓާންޝިޕް ހެދުމަށް ހުރި ދަތިތައް ހައްލުކޮށްފި އެވެ.

މީގެ ކުރިން ދިވެހި ދަރިވަރުން ބަންގްލަދޭޝްއިން އެމްބީބީއެސް އިންޓާންޝިޕް ފުރުސަތު ލިބެނީ ހަމައެކަނި ޗިޓަގޮންގް މެޑިކަލް ކޮލެޖް ހޮސްޕިޓަލުން ނުވަތަ ޝޭރް-އޭ-ބަންގްލާ މެޑިކަލް ކޮލެޖް ހޮސްޕިޓަލުންނެވެ.

ހެލްތް މިނިސްޓްރީން ބުނީ އެ މިނިސްޓްރީ އާއި ފޮރިން އެފެއާޒު ގުޅިގެން ބަންގްލަދޭޝްގައި އެމްބީބީއެސް އިންޓާންޝިޕް ފުރުސަތުތައް ހޯދުމަށް ކުރެވުނު މަސައްކަތުގެ ނަތީޖާއެއްގެ ގޮތުން، އިތުރު ފަސް ކޮލެޖެއްގައި ދިވެހި ދަރިވަރުންނަށް އިންޓާންޝިޕް ފުރިހަމަ ކުރުމުގެ ފުރުސަތު ލިބޭނެ އިންތިޒާމް މިހާރު ހަމަޖެހިފައިވާ ކަމަށެވެ. އެއީ،

1. ސިލެޓު އެމްއޭޖީ އޮސްމާނީ މެޑިކަލް ކޮލެޖު

2. މައިމެންސިންހު މެޑިކަލް ކޮލެޖު

3. ރަޖްޝާނީ މެޑިކަލް ކޮލެޖު

4. ޝަހީދު ޒިއައުރު ރަހުމާން މެޑިކަލް ކޮލެޖު، ބޮގުރާ

5. ކޮކްސަސް ބާޒާރު މެޑިކަލް ކޮލެޖު، މިއެވެ.

މިނިސްޓްރީން ބުނީ މި ފަސް ކޮލެޖަކީ ވެސް ބަންގްލަދޭޝް މެޑިކަލް އެންޑް ޑެންޓަލް ކައުންސިލް އަދި މޯލްޑިވްސް މެޑިކަލް އެންޑް ޑެންޓަލް ކައުންސިލުން ގަބޫލު ކުރާ ކޮލެޖްތައް ކަމަށެވެ.

މި ގޮތުން ބަންގްލަދޭޝް އިން އިންޓާންޝިޕް ޕްލޭސްމަންޓް ހޯދަން ބޭނުންވާ ދަރިވަރުން އީމެއިލް ކުރަން ޖެހޭނީ މިނިސްޓްރީގެ training@health.gov.mv މެއިލް އަށެވެ.

އިންޓާންޝިޕް ފުރުސަތު ރާއްޖެއިން ވެސް އިތުރަށް ފުޅާ ކުރުމުގެ މަސައްކަތް ކުރެވޭއިރު، މި އަހަރު އިތުރު ސަރުކާރު ހޮސްޕިޓަލް ތަކުގައި އިންޓާންޝިޕް ފެށުމަށް މިނިސްޓްރީން ދަނީ މަސައްކަތް ކުރަމުންނެވެ.