"މި އަހަރު ނިމެންވާއިރު ހުރިހާ ރަށެއްގައި ބީއެމްއެލްގެ އޭޓީއެމް ހުންނާނެ"

މި އަހަރު ނިމޭއިރު، ރާއްޖޭގެ ހުރިހާ ރަށެއްގައި އޭޓީއެމްއެއް ބަހައްޓާނެ ކަމަށް ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ މުޙައްމަދު ޝަރީފް ވިދާޅުވެއްޖެ އެވެ.

ޝަރީފް މިހެން ވިދާޅުވީ ހއ. އުތީމުގައި އޭޓީއެމްގެ ހިދުމަތް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މި އަހަރަކީ ބީއެމްއެލްގެ އޭޓީއެމް ހިދުމަތް ދޭން ފެށިތާ 25 އަހަރު ފުރޭ އަހަރެވެ.

ޝަރީފް ވިދަޅުވީ މިދިޔަ 25 އަހަރު ތެރޭގައި ނުބެހެއްޓޭ ވަރަށް އޭޓީއެމް ރަށްރަށުގައި ބަހައްޓާ އެއަށްވުރެ ބޮޑު ނެޓްވޯކެއް މިއަހަރު ނިމެންވާއިރަށް ރާއްޖޭގައި ގާއިމު ކުރެވިގެންދާނެ ކަމަށެވެ.

"މި އަހަރު ނިމެންވާއިރު 250 އޭޓީއެމް ރާއްޖޭގައި ހުރިހާ ރަށް ތަކެއްގައި ހުންނާނެ، އަދި ހަމަ އެއާއެކު ބޭންކުގެ ހިދުމަތްތައް އިތުރަށް ފުޅާވެގެން ގޮސް ފަސޭހައިން ރަށްރަށުގައި ތިބެގެން ހިދުމަތް ލިބޭނެ ގޮތް ފަހިވެގެންދާނެ،" ޝަރީފް ވިދާޅުވި އެވެ.

މި އަހަރުގެ ނިލަޔަށް ރާއްޖޭގެ ހުރިހާ ކަންކޮޅު ތަކެއްގައި ވެސް އޭޓީއެމް ހުޅުވިގެންދާނެ ކަން ފާހަގަ ކުރައްވާ ޝަރީފް ވިދާޅުވީ އެހެން ކަމުން މިއީ ރާއްޖޭގެ އިގުތިސޯދާއި ވިޔަފާރި ތަކުގެ އިތުރުން ރާއްޖޭގެ ޓޫރިޒަމް ދާއިރާ އިތުރަށް ފުޅާ ވެގެން ދާއިރު، ރައްޔިތުންނަށް ފަސޭހައިން ހިދުމަތް ފޯރުކޮށްދިނުމަށް ކުރެވޭ މުހިއްމު މަސައްކަތެއް ކަމަށެވެ.

ޝަރީފް ވިދާޅުވީ މި މަސައްކަތް ނިމުމުން، ކޮންމެ ރަށަކުން ވެސް ފައިސާ ނެގުމާއި ޖަމާ ކުރުމާއި އެކައުންޓް ތަކަށް ފައިސާ ޓްރާންސްފާ ކުރުމާއި ލޯނަށާއި ކްރެޑިޓް ކާޑަށް ފައިސާ ދެއްކުން ފަދަ މުހިންމު ހިދުމަތްތައް ލިބޭނެ ކަމަށެވެ.

މި ރަސްމިއްޔާތުގައި އެންވަޔަރަންމެންޓު މިނިސްޓަރު ތޯރިގު އިބްރާހިމް ދެއްކެވި ވާހަކަފުޅުގައި ވިދާޅުވީ ދިވެހީން މިއަދު ހާސިލު މި ކުރަނީ ރައީސް މުއިއްޒުގެ ދުރު ވިސްނުންފުޅުގައި ހުރި ވަރަށް މުހިއްމު ލަނޑުދަނޑިތަކެއް ކަމަށެވެ.

"އަޅުގަނޑުމެންގެ ރައީސަކު ރައްޔިތުންނަށް ބޭނުންވާ މިކަހަލަ މުހިއްމު ކަންތައްތައް ދެނެވަޑައިގެން އެކަންކަން ވީހާ ވެސް އަވަހަކަށް ރައްޔިތުންނަށް ފޯރުކޮށްދޭ ކަމީ އަޅުގަނޑުމެން ވަރަށް ފަހުރުވެރިވާންޖެހޭ ކަމެއް، މިއީ ރައްޔިތުން އަބަދު ވެސް ބަލައިގަންނަ ކަމެއް، އެކަމަށް ޓަކައި ރައީސަށް ޝުކުރު ދަންނަވަން،" ތޯރިގު ވިދާޅުވި އެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި މި އަހަރު ނިމުމުގެ ކުރިން އޭޓިއެމްތައް ބެހެއްޓުމަށް ސަރުކާރުން އަންނަނީ މަސައްކަތް ކުރަމުންނެވެ.