ކިއުގައި ތިބި އެންމެންނަށް މި އަހަރު ހައްޖަށް ދެވޭނެ: ރައީސް

ހައްޖު ކޯޕަރޭޝަންގެ ކިއުގައި ތިބި އެންމެންނަށް މި އަހަރު ހައްޖަށް ދެވޭނެ ކަމަށް ރައީސުލްޖުމްހޫރިއްޔާ މުޙައްމަދު މުއިއްޒު ވިދާޅުވެއްޖެ އެވެ.

ރައީސް މިރޭ ކުރެއްވި އެކްސް ޕޯސްޓެއްގައި ވިދާޅުވީ ކިއުގައި ތިބި އެންމެހައި ފަރާތް ތަކަށް މި އަހަރު ހައްޖަށް ދެވޭނެ ކަމަށެވެ.

އަދި މިއީ ޒަމާން ތަކަކަށް ފަހު، އެ އަހަރެއްގައި ކިއުގައި ޖެހިފައިތިބި، އެންމެނަށް އެ އަހަރު ހައްޖަށް ދެވޭ ފުރަތަމަ ފަހަރު ކަމަށް ރައީސް ވިދާޅުވި އެވެ.

"މި އަހަރު ހައްޖަށް ދެވޭނެ ކަމަށް ކޯޕަރޭޝަންގެ ކިއުގައި ތިބި އެންމެހައި ފަރާތް ތަކަށް މި އަހަރު ހައްޖަށް ދެވޭނެ، އިންޝާ ﷲ، އަދި މިއީ ޒަމާން ތަކަކަށް ފަހު، އެ އަހަރެއްގައި ކިއުގައި ޖެހިފައިތިބި އެންމެނަށް އެ އަހަރު ހައްޖަށް ދެވޭ ފުރަތަމަ ފަހަރުކަން ފާހަގަކުރަން،" ރައީސް ވިދާޅުވި އެވެ.

ހައްޖުގެ މަތިވެރި އަޅުކަން އަދާ ކުރުމުގައި ލުއި ފަސޭހަ ގޮތްތަކެއް ހަމަޖައްސައިދިނުމުގެ ގޮތުން ރާއްޖެއަށް ހައްޖު ކޯޓާގެ ގޮތުގައި ރަސްމީކޮށް ލިބޭ ހުރިހާ ކޯޓާއެއް ހައްޖު ކޯޕަރޭޝަނަށް ދިނުމަށް ރައީސް ވަނީ ނިންމަވައިފަ އެވެ.

އޭގެ އިތުރުން ރައީސް ވަނީ ދާދި ފަހުން ރާއްޖެއިން ހައްޖަށް މީހުން ގެންދިޔުމާބެހޭ އުސޫލަށް ބަދަލު ގެންނަވާފަ އެވެ.

އެ އުސޫލަށް ގެނައި މައިގަނޑު ބަދަލު ތަކުގެ ތެރޭގައި އަލަށް ހައްޖުގެ އަޅުކަން އަދާ ކުރާން އެދޭ ފަރާތް ތަކަށް އިސްކަންދިނުމާއި ހައްޖުގެ އަޅުކަން އަދާކޮށްފައި ނުވާ މީހުންގެ ތެރެއިން އުމުރުން 65 އަހަރުން ފެށިގެން މަތީގެ މީހުންނަށް ކޮންމެ އަހަރަކު ހައްޖު ކޯޕަރޭޝަނުން ކަނޑައަޅާ ވަކި އިންސައްތައެއް ހާއްސަ ކުރުމާއި ފަރުލު ހައްޖުވެފައިވާ މީހުންނަށް ދެން ފުރުސަތު ލިބޭނީ އެންމެ ފަހުން ހައްޖު ވިތާ ހިޖުރީ ސަނަތުން ފަސް އަހަރު ވުމުން ކަމަށް ކަނޑައެޅުމެވެ.