ކުނިން ހަކަތަ އުފައްދާ ނިޒާމު އަންނަ އަހަރު އޮޕަރޭޝަނަށް ގެންނަނީ

ކ. ތިލަފުށީގައި ގާއިމު ކުރާ ކުނިން ހަކަތަ އުފައްދާ ނިޒާމުގެ މަސައްކަތް ނިންމައި އަންނަ އަހަރުގެ ފަހުކޮޅު އޮޕަރޭޝަނަށް ގެނެވޭނެ ކަމަށް އެންވަޔަރަމަންޓް މިނިސްޓަރު ތޯރިގު އިބްރާހީމް ވިދާޅުވެއްޖެ އެވެ.

މިނިސްޓަރު މިކަން ހާމަ ކުރެއްވީ ރައީސް ޑރ. މުޙައްމަދު މުއިއްޒު، ގްރޭޓާ މާލެ އެންވަޔަރަންމަންޓް އިމްޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫއުގެ މަސައްކަތްތައް ކުރިއަށްދާގޮތް ބައްލަވާލައްވާލެއްވުމަށް ތިލަފުއްޓަށް ކުރެއްވި ޒިޔާތުގެ ތެރެއިން ނޫސް ވެރީންނަށް އިންޓަވިއު ދެއްވަމުންނެވެ.

ތޯރިގު ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގެންނެވި އިރު، ތިލަފުށީގައި ކުރިއަށްދާ މަޝްރޫއު ތަކުގެ ދުވެލި ހުރީ އިންތިހާއަށް ލަސްކޮށް ކަމަށާއި އެހެން ނަމަވެސް މިހާރު އެ މަސައްކަތްތައް ހަލުވި ދުވެލީގައި ކުރިއަށްދާ ކަމަށެވެ.

މި ނިޒާމުން ދުވާލަކަށް 500 ޓަނުގެ ކުނި އުފެއްދޭއިރު، އަންދާ ކުނިން 13 މެގަވޮޓުގެ ހަކަތަ އުފެއްދޭނެ ކަމަށް އެ މަނިކުފާނު ވިދާޅުވި އެވެ. އަދި އޭގެ ތެރެއިން ދިހަ މެގަވޮޓް މާލެ ސަރަހައްދުގެ ގްރިޑަށް އިތުރު ކުރެވި، ބާކީ ތިން މެގަވޮޓް ބޭނުން ކުރާން ނިންމާފައި ވަނީ ތިލަފުށީގައި ކަމަށް ވެސް ވިދާޅުވި އެވެ.

މިނިސްޓަރު ތޯރިގު ވިދާޅުވީ ފޭސް 2 ގެ ކުނިން ހަކަތަ އުފައްދާ މި މަޝްރޫއަށް 145 މިލިއަން ޔޫސްއެއް ޑޮލަރު ހަރަދުވާނެ ކަމަށެވެ.

"މި މަސައްކަތް އިތުރަށް ހަރުދަނާ ކުރުމަށް އިތުރަށް މަސައްކަތް އަވަސް ކުރަން ރައީސް ވަނީ އިރުޝާދު ދެއްވާފައި،" ތޯރިގު ވިދާޅުވި އެވެ.

ތިލަފުށީގައި ޒަމާނީ ފެންވަރުގެ ކުނި މެނޭޖު ކުރާ ނިޒާމެއް ގާއިމު ކުރުމުގެ މަސައްކަތް މިނިސްޓްރީން ކުރަމުން އަންނަނީ އޭޝިއަން ޑިވެލޮޕްމަންޓް ބޭންކް (އޭޑީބީ) އާއި އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) އަދި ޖަޕާން ފަންޑު ފޯ ޖޮއިންޓް ކްރެޑިޓް މެކޭނިޒަމް (ޖޭއެފްޖޭސީއެމް) ގެ އެހީތެރިކަން ލިބިގެންނެވެ.