ސްޓެލްކޯގެ ފައިދާ 137 މިލިއަނަށް، މިއީ ރެކޯޑެއް!

ސްޓެލްކޯގެ އެމްޑީ ހުސެއިން ފަހުމީ -- ފޮޓޯ/ އަވަސް

ގައުމީ ކަރަންޓު ކުންފުނި ސްޓެލްކޯއަށް މިދިޔަ އަހަރު ފައިދާގެ ގޮތުގައި 137.9 މިލިއަން ރުފިޔާ ލިބިފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ފަހުމީ، އެކްސްގައި ކުރެއްވި ޕޯސްޓެއްގައި ވަނީ ފާއިތުވި ހަތް އަހަރު އެ ކުންފުނީގެ އާމްދަނީ ހުރި ގޮތުގެ ތަފުސީލް ހާމަ ކުރައްވާފަ އެވެ.

އެ ހިސާބުތައް ދައްކާ ގޮތުން 2018 ވަނަ އަހަރު ކުންފުންޏަށް ފައިދާގެ ގޮތުގައި 105 މިލިއަން ރުފިޔާ ލިބިފައިވެ އެވެ. 2019 ވަނަ އަހަރު 109 މިލިއަން ލިބިފައިވާއިރު، 2020 ވަނަ އަހަރު ލިބުނީ 130 މިލިއަން ރުފިޔާ އެވެ.

އޭގެ އިތުރުން 2021 ވަނަ އަހަރުގެ ފައިދާއަށް 104.7 މިލިއަން އަދި 2022 ވަނަ އަހަރު 106.8 މިލިއަން ރުފިޔާގެ ފައިދާ ސްޓެލްކޯއިން ހޯދާފައިވެ އެވެ.

އެކަމަކު، 2023 ވަނަ އަހަރު ސްޓެލްކޯއަށް 171.9 މިލިއަން ރުފިޔާގެ ގެއްލުމެއްވި އެވެ. ނަމަވެސް އެ ގެއްލުމުން އަރައިގަނެ، މިދިޔަ އަހަރު އެ ކުންފުނިން ވަނީ ފައިދާގެ ގޮތުގައި 137.9 މިލިއަން ރުފިޔާ ހޯދާފަ އެވެ.

މި އަދަދަކީ ސްޓެލްކޯގެ ފާއިތުވީ ހަ އަހަރު ދުވަހަށް ބަލާ ނަމަ ރެކޯޑެކެވެ.

އެމްޑީ ފަހުމީ ވިދާޅުވީ މިދިޔަ އަހަރުގެ ޕްރޮފިޓް ރަނގަޅުކޮށް، ގެއްލުމުން އަރައިގަނެވުނީ ކުންފުނީގެ ހިންގުމުގެ ނިޒާމް އިތުރަށް ވަރުގަދަކޮށް، ބޭކާރު ހަރަދުތައް ކުޑަކުރުމަށް އެޅުއްވި ހަރުދަނާ ފިޔަވަޅު ތަކުގެ ސަބަބުން ކަމަށެވެ.

ސްޓެލްކޯ