ރައްޔިތުންގެ މަޖިލީހުގެ 19 ވަނަ ދައުރުގައި ރުހުން ނުދިން ތިން ވަޒީރުންނަށް 20 ވަނަ ރައްޔިތުންގެ މަޖިލީހުން ރުހުން ދީފިއެވެ.

އެމްޑީޕީ މެޖޯރިޓީ އޮތް މަޖިލީހުން ރުހުން ނުދިން ވަޒީރުންނަކީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޓާނީ ޖެނަރަލް އަހުމަދު އުޝާމް އަދި ހައުސިން މިނިސްޓަރު ޑރ. އަލީ ހައިދަރެވެ.

މިއަދު ވަނީ އެ ތިން ވަޒީރުންނަށް ރުހުން ދިނުމަށް ވޯޓު އަހާފައެވެ. އެގޮތުން އޭޖީ ކަމަށް އުޝާމަށް ފެންނަ ކަމަށް 87 މެންބަރުން ވޯޓުދެއްވިއެވެ. ނުފެންނަ ކަމަށް އެއްވެސް މެންބަރު ވޯޓެއް ނުދެއްވައެވެ.

ޝަހީމްއަށް ފެންނަ ކަމަށް ވޯޓު ދެއްވީ 83 މެންބަރުންނެވެ. ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.

ހައިދަރަށް 81 މެންބަރުން ފެންނަކަމަށް ވޯޓު ދެއްވިއިރު ނުފެންނަ ކަަމަށް ހަތަރު މެންބަރު ވަނީ ވޯޓު ދެއްވައިފައެވެ. އެހެންކަމުން މިއަދުގެ ޖަލްސާގައި އެ ވަޒީރުނަށް ވަނީ ރުހުން ދީފައެވެ.

19 ވަނަ މަޖިލީހުގައި މި ވަޒީރުންނަށް ރުހުން ދިނުމަށް ފޮނުވި ނަމަވެސް އޭރު އެ ތިން ވަޒީރުންނަށް ރުހުންދީފައެއް ނުވެއެވެ. އޭގެ ފަހުން މި ތިން ވަޒީރުން އަލުން މަޤާމަށް އައްޔަން ކުރުމަށްފަހު ރުހުން ހޯދުމަށް މަޖިލީހަށް ފޮނުވާފައިވަނިކޮށް 19 މަޖިލީހުގެ ދައުރު ނިމިގެންދިޔައިރު ވެސް އެ މަސައްކަތް އޮތީ ނުނިމިއެވެ.

އެހެން ކަމުން 20 ވަނަ މަޖިލީހުން ވަނީ އެ މައްސަލަ ކޮމިޓީއަށް ފޮނުވިއެވެ. ކޮމިޓީއިން އެ ވަޒީރުންގެ މައްސަލައެއްނެތް ކަމަށް ނިންމައި ރުހުން ދިނުމަށް ފާސްކުރިއެވެ. އަދި މަޖިލީހުގެ ތަޅުމަށް ފާސްކުރުމަށް ފޮނުވިއެވެ.