ފުލެޓް ލިސްޓަށް ޝަކުވާ ހުށަހެޅުމުގެ މުއްދަތު އިތުރުކޮށްފި

ރައީސް އިބްރާހީމް މުޙައްމަދު ސޯލިހުގެ ސަރުކާރުން ކުރިއަށް ގެންދިޔަ "ގެދޮރުވެރިޔާ" ސްކީމްގެ ދަށުން ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ 4000 ފުލެޓް ލިބޭ މީހުންގެ ލިސްޓަށް ޝަކުވާ ހުށަހެޅުމުގެ މުއްދަތު އިތުރުކޮށްފި އެވެ.

ހައުސިން މިނިސްޓްރީން މިއަދު ކުރި އިއުލާންގައި ބުނީ މާދަމާއިން ފަށައިގެން 31 ވަނަ ދުވަހުގެ ނިޔަލަށް ސަރުކާރު ބަންދުވާތީ، ޝަކުވާ ހުށަހެޅުމުގެ ފުރުސަތު އަންނަ މަހުގެ 15އާ ހަމައަށް އިތުރު ކޮށްދޭން ނިންމާފައިވާ ކަމަށެވެ.

އެ އިއުލާނުގައި ވަނީ އެ ލިސްޓަށް މިހާތަނަށް ހުށަހަޅާފައިވާ ޝަކުވާތަކަށް ރިއާޔަތްކޮށް، އެކި ފަރާތް ތަކުގެ ކަންބޮޑުވުންތައް އެ މިނިސްޓްރީން ބަލައި ރަނގަޅު ކުރުމުގެ މަސައްކަތް ކުރަމުންދާ ކަމަށެވެ. އަދި މި މަހުގެ ފުރަތަމަ ހަފްތާގެ ނިޔަލަށް 600އަށް ވުރެ، ގިނަ ޝަކުވާ ހުށަހަޅާފައިވާ ކަމަށް ބުނެފައިވެ އެވެ.

އެގޮތުން މައިގަނޑު ގޮތެއްގައި ހުރި ޝަކުވާ ތަކުގެ ތެރޭގައި ރާއްޖެއިން ބޭރުގައި ކިޔަވަން އުޅުނު މުއްދަތު ނުގުނުމުން މާލޭގައި ދިރިއުޅޭތާ 15 އަހަރު ނުވާ ކަމަށް ބަލައި ޑިސްކޮށްލިފައި ކޮށްފައިވުން ހިމެނެ އެވެ.

ޝަރުތު ހަމަނުވާ ކަމަށް ކަނޑައަޅާފައިވާ މީހުން ހުށަހަޅައި ޝަކުވާ ތަކަށް ބަލައި، ސަރުކާރުގެ އިދާރާ ތަކުގައި ހުރި އެ މިނިސްޓްރީ އަށް ޗެކު ކުރެވެން ހުރި މައުލޫމާތު ތަކަށް ރިއާޔަތްކޮށް ޝަރުތު ހަމަވާކަން ސާބިތުވާ ނަމަ، އެ ފަރާތް ތަކަށް ފުލެޓް ލިބޭނެ ކަމުގެ ޔަގީންކަން ހައުސިން މިނިސްޓްރީން ދީފައިވެ އެވެ.

ފުލެޓް ލިސްޓާ ގުޅޭ ގޮތުން، ފޯމު ހުށަނާޅާ މީހުންގެ ޝަކުވާއެއް އޮތް ނަމަ ހައުސިން މިނިސްޓްރީގެ މެއިލް، އަށް ނުވަތަ މިނިސްޓްރީއަށް އެޑްރެސްކޮށް ފޮނުވޭ ސިޓީއަކުން ޝަކުވާ ހުށަހެޅޭނެ އެވެ.