ރައީސްގެ ދަރިކަލަކަށް ތުހުމަތުކޮށް ސާބިތު ނުހިފޭ ވާހަކަ ދެއްކުމުން މަންދީ އަދި ފައްޔާޒަށް ދައުވާކުރަނީ

އިދިކޮޅު އެމްޑީޕީން ކުރަމުން އަންނަ މުޒާހަރާއެއްގައި ރައީސް ޑރ. މުޙައްމަދު މުއިއްޒުގެ ދަރިކަލަކަށް ނިސްބަތްކޮށް ވާހަކަ ދެއްކި މައްސަލަ އެ މަނިކުފާނުގެ އާއިލާގެ ފަރާތުން ކޯޓަށް ހުށަހަޅަން ނިންމަވައިފި އެވެ.

އެމްޑީޕީގެ މުޒާހަރާހައި ރައީސް މުއިއްޒުގެ ދަރިކަލަކަށް އަމާޒުކޮށް ސާބިތު ނުހިފޭ ވާހަކަތަކެއް ދެއްކީ އެ ޕާޓީގެ އެކްޓިވިސްޓެއް ކަމުގައިވާ މަރިޔަމް ޒުބެއިރު (މަންދީ) އެވެ.

މިމައްސަލައިގައި އެމަނިކުފާނުގެ އާއިލާގެ ފަރާތުން މިއަދު ބޭއްވި ނޫސްވެރީންގެ ބައްދަލުވުމުގައި މެޑަމް ސާޖިދާ މުޙައްމަދުގެ ފަރާތުން ނެރުއްވި ބަޔާނުގައި ވަނީ، ރައީސްގެ 16 އަހަރުގެ ދަރިފުޅު އުމައިރު މުޙައްމަދު މުއިއްޒަށް ނިސްބަތްކޮށް އެ މުޒާހަރާގައި ދެއްކި ވާހަކަތައް ދޮގު ކުރައްވާފަ އެވެ. ބަޔާނުގައި ބުނީ އުމައިރުއަކީ ވޭޕް ނުވަތަ ދުންފަތުގެ އިސްތިއުމާލު ވެސް އެއްވެސް ވަރަކަށް ކުރާ ނުވަތަ ކޮށްފައިވާ ކުއްޖެއް ނޫންކަން ވަރަށް ސާބިތުކަމާއެކު ދަންނަވާ ކަމަށެވެ.

ސާޖިދާގެ ބަޔާނުގައިވާ ގޮތުން ދަރިކަލުންނާމެދު ފަތުރާ ވާހަކަތަކުގެ ސަބަބުން އޭނާގެ ކުރިމަގަށް ހުރަސްއެޅުމުގެ ފުރުސަތު އެބައޮތެވެ. އަދި، އެ ކަމަނާއާއި، ރައީސަށް ކުރިމަތިވާ ފުރައްސާރައަށް މިހާތަނަށް އެއްވެސް ރައްދެއް ދެއްވާފައިނުވާނެ ކަން ފާހަގަ ކުރައްވަމުން އެ ބަޔާނުގައި ވިދާޅުވީ އެކަމަނާގެ ދަރިންނަށް ފުރައްސާރައާ ކުރިމަތިވާން ފެށުމުން މަންމައެއްގެ ހައިސިއްޔަތުން ބައެއް ފިޔަވަޅުތައް އަޅުއްވަން ނިންމަވާފައިވާ ކަމަށެވެ.

މިއަދުގެ ނޫސްވެރީގެ ބައްދަލުވުމުގައި ވާހަކަދައްކަވަމުން ގާނޫނީ ވަކީލު އާއިޝަތު އާޒިމާ ޝަކޫރު ވިދާޅުވީ އެ މައްސަލައިގައި ރައީސްގެ އާއިލާގެ ފަރާތުން ޝަރީއަތަށް ހުށަހަޅަން ނިންމާފައިވަނީ މަދަނީ މައްސަލަތަކެއް ކަމަށެވެ.

އެގޮތުން އިހުތިޖާޖުގައި ވާހަކަދެއްކި މަންދީގެ އިތުރުން، އެމްޑީޕީގެ ޗެއާޕާސަން ފައްޔާޒު އިސްމާއީލާއި، އެމްޑީޕީގެ މައްސަލަ ހުށަހެޅުމަށް މިހާތަނަށް ނިންމާފައިވާ ކަމަށް އާޒިމާ ވިދާޅުވި އެވެ.

އާޒިމާ ވިދާޅުވީ އެމްޑީޕީއަށް ދައުވާ ކުރަނީ އެ ޕާޓީން އެ އެއްވުމުގެ ޒިންމާ ނަގާފައިވާތީ ކަމަށެވެ. އަދި ފައްޔާޒަށް ދައުވާ ކުރަނީ އެކަމާ ގުޅިގެން ކުރެއްވި ޓުވީޓަކާ ގުޅުވައިގެން ކަމަށެވެ. އަދި އެ ވާހަކަ ތަކަކީ ކުޑަކުދީން ރައްކާތެރިކުރުމަށް ޓަކައި ރާއްޖޭގައި ހަދާފައިވާ ގާނޫނު ތަކާއި، ބައިނަލްއަގުވާމީ މުއާހަދާތަކާ ހިލާފު ވާހަކަތަކެއް ކަމަށް ވެސް އާޒިމާ ވިދާޅުވި އެވެ.