ސްޓެލްކޯއިން މި އަހަރު ހައްޖާއި އުމްރާއަށް ފޮނުވާ މުވައްޒަފުން ހޮވައިފި

ސްޓެލްކޯއިން މި އަހަރު ހައްޖާއި އުމްރާއަށް ފޮނުވާ މުވައްޒަފުން ހޮވުން --

ސްޓެލްކޯގައި މަސައްކަތް ކުރާ މުވައްޒަފުންގެ ތެރެއިން މި އަހަރު ހައްޖާއި އުމްރާއަށް ފޮނުވާ މުވައްޒަފުން ހޮވައިފި އެވެ.

ގައުމީ ކަރަންޓު ކުންފުނި ސްޓެލްކޯއިން ބުނީ އެ ކުންފުނީގެ މުވައްޒަފުންނަށް ހުޅުވާލި ހައްޖާއި އުމްރާގެ މަތިވެރި އަޅުކަން އަދާ ކުރުމުގެ ފުރުސަތަށް އެދި ހުށަހެޅި މުވައްޒަފުންގެ ތެރެއިން ޝަރުތު ހަމަވާ މުވައްޒަފުންގެ މެދުގައި ގުރުއަތު ލުން ކުރިއަށް ގެންގޮސްފައި ކަމަށެވެ.

އެ ގޮތުން، މި އަހަރު ވެސް ހައްޖުގެ އަޅުކަމަށް ދެ ފިރިހެން މުވައްޒަފުންނާއި އެއް އަންހެން މުވައްޒަފަކު، އަދި އުމްރާގެ އަޅުކަމަށް ދެ ފިރިހެން މުވައްޒަފުންނާއި އެއް އަންހެން މުވައްޒަފަކު ގުތުއަތުން ހޮވާފައިވާ ކަމަށް އެ ކުންފުނިން ބުންޏެވެ.

މި އަހަރުގެ ހައްޖަށް ދާން (އަންހެން ފިރިހެން ވަކިން) ހުޅުވާލި ފުރުސަތަށް އިޖާބަދީ، ހައްޖުގެ އަޅުކަން އަދާ ކުރުމަށް އެދި ހުށަހެޅި 102 މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ 84 މުވައްޒަފެކެވެ. އަދި އުމްރާގެ އަޅުކަން އަދާ ކުރުމަށް 218 ފަރާތަކުން ހުށަހެޅި އިރު، ޝަރުތު ހަމަވެފައި ވަނީ 215 މުވައްޒަފުންނެވެ.

ސްޓެލްކޯއިން ދެމުން އަންނަ ހައްޖުގެ އަޅުކަމުގެ ފުރުސަތު ދެނީ އެ ކުންފުންޏަށް 15 އަހަރަށް ވުރެ، ގިނަ ދުވަހު ހިދުމަތް ކުރުމުގައި ދެމިތިބޭ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ. އަދި އުމްރާގެ އަޅުކަމުގެ ފުރުސަތު ދެނީ ފަސް އަހަރަށްވުރެ، ގިނަ ދުވަހު ހިދުމަތްކޮށްދީފައިވާ މުވައްޒަފުންގެ ތެރެއިން އެ ކަމަށް ކުރިމަތިލާ މުވައްޒަފުންނަށެވެ.

ސްޓެލްކޯ