"ފެނުން" ދިރުން" އާޓް އެގްޒިބިޝަންގެ ބައިވެރިންގެ ނަމުގައި ގަހެއް އިންދުމަށް އެމްޑަބްލިޔުއެސްސީން ނިންމައިފިއެވެ.

ރޭ ސަލްޓަން ޕާކުގައި މި އާޓް އެގްޒިބިޝަން ފަށާފައިވާއިރު މި މުބާރާތުގައި ބައިވެރިވާ ކޮންމެ ބައިވެރިޔެއްގެ ނަމުގައި ގަހެއް އިންދާނެ ކަމަށް އެމްޑަބްލިޔުއެސްސީން ވަނީ ވިދާޅުވެފައެވެ.

"މި މުބާރާތުގައި އެންމެ ފާހަގަކޮށްލެވޭ އެއް ކަމަކީ މި އެގްޒިބިޝަނުގައި ބައިވެރިކުރާ ކުރެހުންތައް އާންމުންނަށް ގަތުމަށް ހުޅުވާލެވޭނެ. ކުރެހުންތައް ވިއްކުމަށްފަހު ކޮންމެ އާޓިސްޓަކަށް ކުރެހުމުގެ އަގު 15 އިންސައްތަ ލިބިގެންދާނެ، ބާކީ 85 އިންސައްތަ ބޭނުން ކުރެވޭނީ ރާއްޖޭގެ އެކި ކަންކޮޅުތަކުގައި ގަސް އިންދުމަށް. އަދި ކޮންމެ ބައިވެރިއެއްގެ ނަމުގައި ގަހެއް އިންދިގެންދާނެ." އެމްޑަބްލިޔުއެސްސީން ވިދާޅުވިއެވެ.

ކުރެހުން ތެރިންގެ ކުރެހުންތައް ވިއްކާލަން ނިންމާފައިވަނީ ކުރެހުންތެރިންނަށްވެސް އޭގެ މަންފާ ލިބޭ ގޮތަށެވެ. އެގޮތުން ކޮންމެ ކުރެހުންތެރިޔަކަށް އެ ކުރެހުމުގެ އަގުގެ 15 އިންސައްތަ ލިބިގެންދާއެވެ. އަދި މި މުބާރާތާއި ގުޅޭ އިތުރު ސެޝަންތަކެއް ނަގައިދޭނެ ކަމަށްވެސް އެމްޑަބްލިޔުއެސްސީއިން ވަނީ ވިދާޅުވެފައެވެ.

ފެނުން ދިރުން ކުރެހުމުގެ މުބާރާތަކީ ދިވެހި ފަންނުވެރި ކުރެހުންތެރިންނަށް ހުޅުވާލެވުނު ފުރުސަތެކެވެ. މި ކުރެހުމުގެ މުބާރާތުގެ މަގްސަދަކީ ދިވެހި ކުރެހުންތެރިންގެ ފިހި ތަކުން ފެނާއި ދިރުމާއި ވެށި ދައްކާލަ ދިނުމަށް ހުޅުވާލި ފުރުސަތެއް ކަމަށް އެމްޑަބްލިއުއެސްސީ އިން ބުނެއެވެ.

މުބާރާތް އިންސާފު ކޮށްދެއްވާނީ ނެޝެނަލް ސެންޓަރ އޮފް ދި އާޓްސްއާއި، މިނިސްޓްރީ އޮފް ޔޫތް، އެމްޕަވަރމެންޓް، އިންފޮމޭޝަން އެންޑް އާޓްސްއިން ކަޑައަޅާފައިވާ ހާއްސަ ޕެނަލަކުންނެވެ.

މި އެގްޒިބިޝަނާއި ބެހޭ އިތުރު މައުލޫމާތު އެމްޑަބްލިޔުއެސްސީގެ ވެބްސައިޓް އިން ލިބިގެން ދާނެއެވެ.

"ފެނުން" ދިރުން" ނަމުގައި އެމްޑަބްލިޔުއެސްސީ އިން އިއްޔެ ހަވީރު ވަނީ ކުޑަކުދިންގެ ހަވީރެއްވެސް ބާއްވާފައެވެ