އެންމެބޮޑު އެއް ފާފައަކީ ދޮގުހެދުމާއި، މީހުންގެ އަބުރަށް އަރައިގަތުން: ހުތުބާ

މިއަދު މާބޮޑު ކަމެއްގެ ގޮތުގައި ނުދެކި އަހަރެމެންނަށް އަރައިގަނެވޭ އެންމެބޮޑު އެއް ފާފައަކީ ދެބައޮޑުވުމާއި ގީބަ ބުނުމާއި ދޮގު ވާހަކަ ތަކާއި ހަޑިހުތުރު ބަސް ތަކުން މީސްތަކުންގެ އަބުރަށް އަރައިގަނެ, އުނދަގޫ ކުރުން ކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި އަލިއަޅުވާލާފައިވާ މައުލޫއަކީ "ރޯދައިގެ ހިކުމަތް" މިއެވެ.

ހުތުބާގައި ބުނީ ހާއްސަކޮށް މީސް މީޑިޔާގެ މަންސަ ތަކުގައި އަހަރެމެން މިއަދު މި ކަންކަން ކުރަނީ ފާޅުކަން ބޮޑު ގޮތެއްގައި އެއްވެސް ޖެހިލުމެއްނެތި ކަމަށެވެ. އަދި މިއީ މާތް ﷲ ހަރާމް ކުރައްވައިފައިވާ ބޮޑެތި ފާފަ ތަކުގެ ތެރޭގައި ހިމެނޭ ކަންކަން ކަމަށެވެ.

ރޯދައިގެ ހިކުމަތް ތަކުގެ ތެރޭގައި ހިމެނޭ އަނެއް ކަމަކީ، ޝައިތާނާ ނިކަމެތިކޮށް ބަލިކަށި ކޮށްލުން ކަމަށާއި ނަތީޖާއެއްގެ ގޮތުން، ޝައިތާނާގެ ވަސްވާސްތަކާ މީހާ ދުރުކޮށްދޭ ކަމަށް ހުތުބާގައި ބުނެފައިވެ އެވެ. އަދި އެއީ ހެޔޮ އަމަލު ތަކުގައި، މީހާ މަސްއޫލު ކުރުވައި ނުބައި އަމަލުތަކާ އޭނާ ދުރުހެލި ކުރުވައި ކަމެއް ކަމަށް ވެސް ބުނެފައިވެ އެވެ.

ރޯދައިގެ ހިކުމަތް ތަކުގެ ތެރޭގައި ހިމެނޭ އެންމެ މުހިއްމު އެއް ކަމަކީ، ސިއްރާއި ފާޅުގައި، ތިމާ ކުރާ އަމަލުތައް މާތް ﷲ ބައްލަވައިވޮޑިގެންވާކަން ދަނެ، ތިމާގެ ނަފުސު ތަހުޒީބު ކުރުން ކަން ފާހަގަކޮށް ހުތުބާގައި ބުނީ ރޯދައަކީ، ރޯދަވެރިޔާ އާއި އޭނާގެ ވެރި ރަސްކަލާނގެއާ ދެމެދުގައިވާ ސިއްރެއް ކަމަށެވެ.

ރޯދަވެރިޔާ ރޯދަ ގެއްލޭ ކަންތައް ތަކުން ދުރުހެލިވެ ހުންނަނީ، މާތް ﷲގެ ރުހިވޮޑިގަތުން ލިބިގަތުމަށް ކަމަށާއި އެހެނީ ރޯދައަށް ހުރެ ސިއްރިޔާތުގައި ކައިބޮއި އުޅުނަސް، މީހަކަށް އެ ކަމެއް ނޭނގޭނެ ކަމަށާއި ރޯދަވެރިޔާއަށް އޭގެ މިންވަރު ނޭނގޭ ގިނަގުނަ ދަރުމަ ދެއްވުމަށް މާތް ﷲ ވައުދުވެވޮޑިގެންފައި ވަނީ، މި އަޅުކަމުގައި ހުރި އިހުލާސްތެރި ކަމުގެ ބޮޑުކަމުން ކަމަށް ހުތުބާގައި ބުންޏެވެ.

ހުތުބާގައި ބުނީ ރޯދައިގެ ހިކުމަތަކީ، މާތް ﷲއަށް ބިރުވެތިވެ، ތަގުވާވެރިވުން ކަމަށެވެ. އަދި ކުރާން އާދަވެފައިވާ ކަންތައްތަކުން ދުވަސްކޮޅަކަށް ނަމަވެސް އެއްކިބާވެ ހުރުމީ، ދުނިޔޭގެ އެދުންތަކުން ނަފުސު ސަލާމަތް ކުރުމަށް ދެވޭ ތަރުބަވީ ފިލާވަޅެއް ކަމަށް ވެސް މިއަދުގެ ހުކުރު ހުތުބާގައި ބުނެފައިވެ އެވެ.