ރާއްޖޭގައި ގާއިމު ކުރަން ނިންމާފައިވާ ފިޝަރީޒް ކޮލެޖަށް އަންނަ މަހުގެ ތެރޭގައި ޑީންއެއް ހަމަޖައްސައި އޮގަސްޓް މަހުގެ ތެރޭގައި އެ ތަނުގައި ކޯސްތައް ފަށަން ތައްޔާރީތައްވަމުން އަންނަ ކަމަށް ފިޝަރީޒް މިނިސްޓްރީން ބުނެފި އެވެ.

ފިޝަރީޒް މިނިސްޓްރީ އާއި އެމްއެންޔޫ ގުޅިގެން ފިޝަރީޒް ކޮލެޖް ގާއިމު ކުރުމުގެ އެއްބަސްވުމުގައި ސޮއިކުރީ މިދިޔަ އަހަރުގެ ޑިސެމްބަރު މަހުގެ 27 ގަ އެވެ.

ފިޝަރީޒް މިނިސްޓްރީގެ ސްޓޭޓް މިނިސްޓަރު ޑރ. އަމްޒަތު އަހުމަދު ދައުލަތުގެ މީޑިއާ ޕީއެސްއެމްގައި ވިދާޅުވީ ފިޝަރީޒް ކޮލެޖްގެ ކިޔެވުން ފެށުމަށް ވާންޖެހޭ ތައްޔާރީތައް ވަރަށް ހަލުވިކޮށް މިހާރު ކުރިއަށްދާ ކަމަށެވެ.

"އަޅުގަނޑުމެން މަސައްކަތް ކުރަމުން މި އަންނަނީ ޖުލައި މަހު ކޮލެޖަށް ޑީންއެއް އައްޔަންކޮށް ކޮލެޖްގެ ރަސްމީ މަސައްކަތް ފެށުމަށް،" އޭނަ ވިދާޅުވި އެވެ. "އެގޮތުން ކުރިއަށް އޮތް [އޮގަސްޓް] އެމްއެންޔޫގެ އިންޓޭކްގައި މި ކޮލެޖްގައި ޑިގްރީ ފެންވަރަށް ޕްރޮގްރާމްތައް މަސްވެރިކަމުގެ އެކި ދާއިރާތަކުން ފެށުމަށް ދަނީ މަސައްކަތްކުރަމުން."

އެމްއެންޔޫ އިން ބުނީ ކޮލެޖްގެ މަސައްކަތް ފެށުމަށް ތައްޔާރުވަމުން އަންނަ އިރު، ކޯސްތައް ފަރުމާކޮށް ނިމިފައިވާ ކަމަށެވެ. އަދި އެ ކޯސްތައް ހިންގުމަށް ބޭނުންވާ ހުއްދަ ހޯދުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އަށް ފޮނުވާފައިވާ ކަމަށް ވެސް ޔުނިވަސިޓީން ބުންޏެވެ.

ފިޝަރީޒް ކޮލެޖްގެ ބޭނުމަކީ މަސްވެރިކަމުގެ ސިނާއަތަކީ ކިޔަވައިގެން ތިބި ތަޢުލީމީ މީހުން ޙަރަކާތްތެރިވާ ސިނާޢަތަކަށް ހެދުމެވެ. ކަމަށެވެ.

މަސްވެރިކަމުގެ ދާއިރާ އިން ތައުލީމީ މީހުން ބިނާކުރުމަށް ކޮލެޖެއް ގާއިމުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.