ރޯދަމަހުގެ ފުރަތަމަ އިހުޔާ ފޯރަމް މިރޭ، ތަގުރީރު ކުރައްވާނީ ޑރ. ޝަހީމް

ރަމަޟާން މަހުގެ ރޭތައް އިހުޔާ ކުރުމަށް ކުރިއަށް ގެންދާ އިހުޔާ ފޯރަމް ސިލްސިލާގެ ފުރަތަމަ ފޯރަމް މިރޭ، އޮންނާނެ ކަމަށް ކަމަށް އިސްލާމިކް މިނިސްޓްރީން ބުނެފިވެ އެވެ.

އިސްލާމިކް މިނިސްޓްރީން ބުނީ މިރޭގެ ފޯރަމްގައި "ހެޔޮ ގޮތުގައި މުދާ ހޯދުމާއި ބޭނުން ކުރުން" މި މައުލޫއަށް ތަގުރީރު ކުރައްވާނީ މިނިސްޓަރު ޝަހީމް އަލީ ސައީދު ކަމަށެވެ.

އިސްލާމީ މަރުކަޒުގެ ޖަލްސާ ކުރާ މާލަމުގައި ބާއްވާ މި އިހުޔާ ފޯރަމް ފެށުން ހަމަޖައްސާފައިވަނީ ރޭގަނޑު 21:30ގަ އެވެ.

އެހެން އަހަރުތަކެކޭ އެއްގޮތަށް މި އަހަރު ވެސް އިހުޔާ ފޯރަމަށް ހާޒިރުވާ ފަރާތް ތަކުގެ ތެރެއިން ގުރުއަތުން ހޮވޭ ފަރާތަކަށް ހާއްސަ އިނާމު ތަކެއް ދިނުމަށް ނިންމާފައިވާ ކަމަށް މިނިސްޓްރީން ބުންޏެވެ.

މި ރަމަޟާން މަހު މާލޭގައި 8 އިހުޔާ ފޯރަމް، އަދި އަތޮޅުތެރޭގެ 7 ރަށެއްގައި އިހުޔާ ފޯރަމް ކުރިއަށް ގެންދިއުމަށް ވަނީ ނިންމާފަ އެވެ.

މި އަހަރުގެ ފޯރަމްގައި މާލޭގައި ތަގުރީރު ކުރައްވާނީ ޑރ. އަބްދުއްސައްތާރު އަބްދުއްރަހުމާން، ޝައިހު އަހުމަދު ސަމީރު އިބްރާހީމް، ޝައިހު މުޙައްމަދު ގުބާދު އަބޫބަކުރު، ޝައިހު މުޙައްމަދު ލަތީފު، ޑރ. މޫސާ އަންވަރު ހަސަން، ޑރ. އަނާރާ ނައީމްގެ އިތުރުން ޑރ. އަލީ ޒާހިރު ބިން ސައީދު ގާސިމް އެވެ.

އަތޮޅުތެރޭގެ ރަށްރަށުގައި ކުރިއަށް ގެންދާ ފޯރަމް ތަކުގައި ތަގުރީރު ކުރައްވާނީ ޝައިހް އަބްދުﷲ ސައުދާން، ޝައިހް މުޙައްމަދު ފިރުޒުލް އަބްދުﷲ ހަލީލް، ޝައިހް އަލީ ޝަހީދު، ޝައިހް ނިމާލު މުޙައްމަދު، އުސްތާޒު އުސާމް މުޙައްމަދު ސައީދު، ޝައިހް އާޒިމް ހާލިދުގެ އިތުރުން ޝައިހް އިމްތިތާއު އައްބާސް އެވެ.

މީގެ އިތުރުން ހަ ސުކޫލަކާއެކު ދަރިވަރުންގެ އިހުޔާ ފޯރަމް ވެސް މި އަހަރު އޮންނާނެ އެވެ.