އޭޕްރީލް މަހު ފޮނުވާ ބިލުތަކަށް ރޯދަ ޑިސްކައުންޓް ދޭނެ: އެމްޑަބްލިޔުއެސްސީ

އޭޕްރީލްމަހު ޑޮމެސްޓިކް ކަސްޓަމަރުންނަށް ފޮނުވާ ބިލުތައް އާންމު މަހަކަށް ވުރެ، ބޮޑު ނުވާނޭ ގޮތުގެ މަތީން ޑިސްކައުންޓު ދިނުމަށް ނިންމާފައިވާ ކަމަށް އެމްޑަބްލިޔުއެސްސީން ބުނެފި އެވެ.

މިދިޔަ އަހަރެކޭ އެއްގޮތަށް މި އަހަރުގެ ރޯދަ މަހުވެސް ފެން ބިލާއި ކަރަންޓު ބިލުން ޑިސްކައުންޓު ދިނުމަށް ރައީސް ޑރ. މުޙައްމަދު މުއިއްޒު ވަނީ ނިންމަވާފަ އެވެ.

ރައީސްގެ އެ ނިންމެވުމާ ގުޅުވައިގެން އެމްޑަބްލިޔުއެސްސީން މިއަދު ވަނީ ރޯދަ މަހުގެ ފެންބިލުން ޑިސްކައުންޓު ދިނުމަށް ނިންމާފައިވާ ގޮތުގެ އުސޫލު އާންމު ކޮށްފަ އެވެ.

އެ އުސޫލުގައިވާ ގޮތުން އާންމު މަހެއްގައި ފެނާއި ކަރަންޓު ބިލުގެ މިންވަރު ކަމުގައި ބަލާނީ މިދިޔަ އަހަރުގެ ފެބުރުއަރީ، މާޗު އަދި އޭޕްރީލް މަސް ނުހިމަނާ، އެ އަހަރުގެ ބާކީ އޮންނަ ނުވަ މަހުގެ އެވްރެޖެވެ.

ފެން ކުންފުނިން ބުނީ ބިލުން އުނިކޮށްދެވޭ މިންވަރަކީ އޭޕްރިލް މަހުގެ ބިލުގެ 10 ޕަސެންޓަށް ވުރެ، ކުޑަ މިންވަރެއް ކަމުގައިވާ ނަމަ، އެއާ އެއްވަރަށް މަތިކޮށްދޭނެ ކަމަށެވެ. އަދި އޭޕްރީލް މަހުގެ ބިލު، "އާންމު މަހަށް" ވުރެ ކުޑަ ނަމަ، 10 ޕަސެންޓު ޑިސްކައުންޓު ދެވޭނެ ކަމަށް ވެސް ބުނެފައިވެ އެވެ.

މީގެ އިތުރުން އޭޕްރިލް މަހު އަލަށް ބިލު ކުރެވޭ މީޓަރު ތަކަށާއި، ކުރީން ރަޖިސްޓްރީ ކުރެވިފައިވީ ނަމަވެސް، މިހާތަނަށް ބިލު ކުރެވިފައި ނުވާ ކަސްޓަމަރުންނަށް ފުރަތަމަ ފޮނުވާ ބިލަކީ އޭޕްރިލް މަހު ފޮނުވާ ބިލު ކަމުގައިވާ ނަމަ، އެ ފަރާތް ތަކަށް ވެސް 10 ޕަސެންޓު ޑިސްކައުންޓު ދޭނެ އެވެ.

މިކަމާބެހޭ ގޮތުން އިތުރު މައުލޫމާތު ސާފު ކުރާން ބޭނުންވާ ފަރާތް ތަކުން އެ ކުންފުނީގެ ކަސްޓަމާ ކެއާ ސެންޓަރުގެ ހޮޓްލައިން 105 އަށް ގުޅައިގެން ނުވަތަ 1050އަށް އެސްއެމްއެސް ފޮނުވައިގެން ނޫނީ އީމެއިލް މެދުވެރިކޮށް، އެހީތެރިކަން ހޯދޭނެ އެވެ.