ފުލެޓް ލިސްޓަށް އެއްވެސް ނުފޫޒެއް ފޯރުވާފައެއް ނުވާނެ: ރައީސް

މިއަދު ސަރުކާރުން އިއުލާންކުރި ފުލެޓް ލިސްޓު އެކުލަވައިލުމުގައި ޒައްރެއްގެ މިންވަރެއްގެ ނުފޫޒެއްވެސް ފޯރުވާފައި ނޯންނާނޭ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މި ޔަގީންކަން ދެއްވާފައި ވަނީ، އިއްޒުއްދީން ފާލަން އަލުން ތަރައްގީކޮށް އިފުތިތާހު ކުރުމަށް ފަހު މިރޭ، ޖުމްހޫރީ މައިދާނުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ މިއަދު އިއުލާން ކުރެއްވި ލިސްޓު އާންމުކޮށްފައި އެވަނީ، މިދިޔަ ސަރުކާރުން އިއުލާން ކުރި ލިސްޓުގައި ހުރި މައްސަލަތައް އޭސީސީއިން ބަލައި، އެ ސަރުކާރުން އިއުލާން ކުރި ޝަރުތު ތަކަށް ޕޮއިންޓްދޭން ކަނޑައަޅާފައިވާ އުސޫލަށް ބައްލަވައިގެން ކަމަށެވެ. އަދި ލިސްޓުން ބަޔަކު އުނިވެފައިވާ ނަމަ، އެ އުނިވީ ސަބަބުތައްވެސް އެނގޭނެ ކަމުގައި އެމަނިކުފާނު ވިދާޅުވިއެވެ.

ހަމަ ޔަގީނުންވެސް ގަސްދުގައި އެއްވެސް މީހަކު ލިސްޓުން އުނިކޮށްފައި ނުވާނޭ ކަމަށާއި، މި ސަރުކާރަކީ، ރައްޔިތުންނަށް ކަންކަން ފުރިހަމަކޮށް ދިނުމުގައި އިންތިހާއަށް ޝައުގުވެރިކަންހުރެ، ހަމަހަމަކަމާއި ލޯތްބާއި އަދުލުވެރިކަމާއެކު ހިދުމަތް ކުރަން އައި ސަރުކާރެއް ކަމުގައި އެ މަނިކުފާނު ވިދާޅުވި އެވެ.

އެމަނިކުފާނު ވިދާޅުވީ، މިއީ އެ މަނިކުފާނަށް ގެދޮރުވެރި ކަމުގެ މައުލޫމާތުތައް އެނގިވަޑައިގަންނަވަން ފެއްޓެވީއްސުރެ، ނުފޫޒެއް ނުފޯރުވާ، ގެދޮރު ލިބޭނޭ މީހުންގެ ލިސްޓެއް ނެރުއްވި ފުރަތަމަ ފަހަރު ކަމަށެވެ.

އަދި އެކި ސަބަބުތަކާ ހުރެ ލިސްޓަށް ނޭރި ރައްޔިތުން، ކަނޑައެޅިފައިވާ މުއްދަތުގެ ތެރޭގައި ކަނޑައެޅިފައިވާ އުސޫލުން ޝަކުވާ ހުށަހެޅުއްވުމަށް އެމަނިކުފާނު އިލްތިމާސް ކުރެއްވި އެވެ.

ޝަކުވާގެ މުއްދަތު ހަމަވެ، މައްސަލަތައް ބަލައި، ހައްގުވެރީންނަށް ފްލެޓް އެކަށަ އެޅުމަށްފަހު، ބާކީ ފުލެޓް ހުރި ނަމަ، އެ ފުލެޓަށް ކުރިމަތިލީ މީހުންގެ ތެރެއިން މިންގަނޑު ތަކަށް ބެލުމަށްފަހު، ޕޮއިންޓް ލިބޭ ތަރުތީބުން ފުލެޓް ހަމަޖެހިގެންދާނޭ ކަމަށް އެ މަނިކުފާނު ވިދާޅުވި އެވެ.

އޭގެ އިތުރުން އެ ލިސްޓުގައި ނުހިމެނުނު ނަމަވެސް، މާލޭ ސަރަހައްދުގައި ހިންގައި ގެދޮރުވެރި ކަމުގެ ބިޔަ މަޝްރޫއު ތަކުގެ ތެރެއިން މާލޭގެ ރައްޔިތުންނާއި މާލޭގައި ދިރިއުޅޭ ރައްޔިތުންގެ ތެރެއިން 18 އަހަރު ފުރިފައިވާ ކޮންމެ ރައްޔިތަކަށް ގެދޮރުވެރިކަމުގެ ފުރުސަތު ފަހިވެގެންދާނޭ ކަމުގެ ޔަގީންކަން އެ މަނިކުފާނު ދެއްވި އެވެ.