ރޯދަމަހުގެ ފުރަތަމަ ދުވަހުން ފަށައިގެން ފިތުރު ޒަކާތް ބަލައިގަންނާނެ

ރޯދަ މަހުގެ ފުރަތަމަ ދުވަހުން ފަށައިގެން ރޯދަ މަހުގެ 27 ވަނަ ދުވަހުގެ ނިޔަލަށް ފިތުރު ޒަކާތް ބަލައިގަންނާނެ ކަމަށް އިސްލާމިކް މިނިސްޓްރީން ބުނެފި އެވެ.

އެ މިނިސްޓްރީގެ ދަށުން ހިންގައި ޒަކާތު ހައުސުން ބުނީ ރަމަޟާން މަހުގެ ފުރަތަމަ ދުވަހުން ފަށައިގެން 27 ވަނަ ދުވަހުގެ ހެނދުނު 6:00އާ ހަމައަށް ފިތުރު ޒަކާތް ބަލައިގަންނާނެ ކަމަށެވެ.

އޮންލައިންކޮށް ޒަކާތް ބަލައިގަންނާނީ:

1. ދިރާގް އެޕު، ދިރާގު ޕޭ އަދި އެސްއެމްއެސް މެދުވެރިކޮށް

2. އުރީދޫ އެމްފައިސާ އަދި އެސްއެމްއެސް މެދުވެރިކޮށް

3. ބޭންކް އޮފް މޯލްޑިވްސް ޕޯޓަލް

4. މޯލްޑިވްސް އިސްލާމިކް ބޭންކް، ފައިސާ މޮބައިލް، އެޕްލިކޭޝަން އަދި ފައިސާ ނެޓް

5. ފަހިޕޭ އެޕްލިކޭޝަން އަދި ވެބްސައިޓް

6. ބަނޑޭރި ޕޭ

އެ މިނިސްޓްރީން ބުނީ ބަނޑޭރިޕޭ އަދި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ޒަކާތް ބަލައިގަންނާނެ ކަމަށެވެ. އަދި އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތް ތަކަށް ހާއްސަކޮށް އިސްލާމިކް މިނިސްޓްރީގެ ހޯލުގައި ޒަކާތް ބަލައިގަންނާނެ އިންތިޒާމުތައް ހަމަޖައްސާފައިވާ ކަމަށް ވެސް އެ މިނިސްޓްރީން ބުނެ އެވެ.

އޭގެ އިތުރުން ރޯދަ މަހުގެ ފަހު ދިހައަކީ ސަރުކާރު ބަންދު ދުވަސް ތަކަކަށް ވުމުން، ކައުންޓަރުން ޒަކާތް ބަލައިގަންނާނީ، 2 މާޗުން 20 މާޗަށް، ރަސްމީ ބަންދު ނޫން ކޮންމެ ދުވަހަކު 9:30 އިން 13:00 ހަމައަށެވެ. 23 މާޗުން 30 މާޗަށް، ހުކުރު، ހޮނިހިރު ދުވަސް ފިޔަވާ ކޮންމެ ދުވަހެއްގެ ވެސް 11:00 އިން 14:00އަށެވެ.

ފިތުރު ޒަކާތުގެ ނިސާބު:

1. އާދައިގެ ހަނޑޫ 12ރ.

2. ތައިލެންޑް ހުދު ހަނޑޫ 62ރ.

3. ރަތް ހަނޑޫ 86ރ.

4. ބާސްމަތީ ހަނޑޫ (އާދައިގެ) 74ރ.

5. ބާސްމަތީ ހަނޑޫ (މޮޅު) 100ރ.

6. ބާސްމަތީ ހަނޑޫ (އެންމެ މޮޅު) 133ރ.

7. އާދައިގެ ފުށް 10ރ.

8. އާޓާ ފުށް 75ރ.

މާލެ ސިޓީ ފިޔަވައި ރަށްރަށުގައި ނަގުދު ފައިސާއިން ފިތުރު ޒަކާތް ބަލައިގަތުމުގެ އިންތިޒާމު ހަމަޖައްސާނީ އެރަށެއްގެ ރަށު ނުވަތަ ސިޓީ ކައުންސިލުތަކުން ކަމަށް ވެސް މިނިސްޓްރީން ބުންޏެވެ.