ރައީސްގެ ވައުދާ އެއްގޮތަށް ފައިނުގައި އެއާޕޯޓު އަޅަން ހަވާލުކޮށްފި

ފައިނުގައި އެއާޕޯޓު އަޅަން އެމްޓީސީސީއާ ހަވާލު ކުރުމުގެ ރަސްމިއްޔާތުގެ ތެރެއިން --ފޮޓޯ/ އެމްޓީސީސީ

ރ. ފައިނުގައި އެއާޕޯޓު އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ މިއަދު ހަވާލުކޮށްފި އެވެ.

މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) ގައި ބޭއްވި ރަސްމިއްޔާތުގައި އެ މަޝްރޫއު ކުރިއަށް ގެންދަން އެމްޓީސީސީއާ ހަވާލު ކުރި ކަމުގެ އެއްބަސްވުމުގައި އެމްއޭސީއެލްގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޝަރީފު މުޙައްމަދެވެ.

އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އަހުމަދު ސައުދީ އެވެ.

މި އެއްބަސްވުމުގެ ދަށުން ފައިނު އެއާޕޯޓު، އަޅާން ބޭނުންވާ ފީސިބިލިޓީ ދިރާސާ ތަކާއި، އެންވަޔަންމެންޓު އިމްޕެކްޓް އެސެސްމެންޓް (އީއައިއޭ) ގެ އިތުރުން ޑިޒައިން މަސައްކަތް ކުރާނެ އެވެ.

ފައިނު އެއާޕޯޓެއް އަޅައިދިނުމަކީ ރިޔާސީ ކެމްޕޭންގައި ރައީސް ޑރ. މުޙައްމަދު މުއިއްޒު ވެވަޑައިގެންނެވި ވައުދެކެވެ.

އޭރު އެމަނިކުފާނު ވިދާޅުވީ ފައިނުގައި އެއާޕޯޓެއް އެޅުމަކީ އެ ރަށާއި އެ ސަރަހައްދުގެ އިގުތިސާދީ ކުރިއެރުމަށް އޮތް ފުރުސަތެއް ކަމަށެވެ.

މިއީ ފަތުރުވެރިކަމުގެ ސިނާއަތަށް ކުރެވޭ އިންވެސްޓްމަންޓަކަށް ވާނެ ކަމަށާއި އަދި އެ އާޕޯޓުން އިތުރު ވަޒީފާތައް އުފެދުމާއެކު އެ ސަރަހައްދަށް ގިނަ ރިސޯޓުތައް އައުމުގެ މަގުފަހިވާނެ ކަމަށް ވެސް ރައީސް ވިދާޅުވި އެވެ.

އެމްޓީސީސީ