ނޫރުލް އަޛާން ބަންގި މުބާރާތް މިރޭ ފަށަނީ

އިސްލާމިކް މިނިސްޓްރީން ކުރިއަށް ގެންދާ ނޫރުލް އަޛާން ބަންގި މުބާރާތުގެ ފެށުމުގެ ރަސްމިއްޔާތާއި ފުރަތަމަ ބުރު މިރޭ ކުރިއަށް ގެންދާ ގޮތަށް ނިންމައިފި އެވެ.

މުޅިއެކު 10 ބައިވެރީންނާއެކު ކުރިއަށްދާ މި މުބާރާތުގެ ފައިނަލް ބުރަށް ދަތުރު ކުރާނީ ފުރަތަމަ ބުރުން އެންމެ މަތިން މާކްސް ހޯދާ ހަ ބައިވެރީންނެވެ. ފައިނަލް ބުރުގައި ވާދަކުރާ ހަ ބައިވެރީންގެ ތެރެއިން އެއް ވަނަ، ދެ ވަނަ އަދި ތިން ވަނަ ހޮވާ ގޮތަށް ވަނީ ހަމަޖައްސާފަ އެވެ.

މިނިސްޓްރީން ބުނީ މި މުބާރާތުގެ ފުރަތަމަ ބުރަށް ބައިވެރީން ހޮވާފައި ވަނީ އެ ކަމަށް ބޭއްވި އޮޑިޝަންއަކުން ކަމަށާއި އެ އޮޑިޝަންގައި 20 ބައިވެރީން ވާދަކޮށްފައިވާ ކަމަށެވެ.

ސަރުކާރުން މި ފަދަ މުހިއްމު މުބާރާތެއް އިންތިޒާމް ކުރުމުގެ މަގުސަދަކީ ރީތި ރާގު ތަކަށް ސައްހަ މަގުން ހުނަރުވެރި ކަމާއެކު ބަންގިދޭ ޒުވާނުން ތަކެއް އުފެއްދުމާއި ޒުވާނުންނާއި ކުދިބޮޑު އެންމެންގެ ހިތް ތަކުގައި އެ ކަމަށް ޝައުގުވެރިކަން އުފެއްދުމާއި ގައުމުގެ އިސްލާމީ ޝަހުސިއްޔަތު ވަރުގަދަ ކުރުމާއެކު ރީތިކޮށް ބަންގިދޭ ޒުވާނުންގެ ޕޫލެއް އެކުލަވައިލުމެވެ.

އޭގެ އިތުރުން މި ފަންނުގެ ރޫހު އާލާ ކުރުމާއި ދިރުވުމާއި ކުރިއެރުވުމާއި އަދި މިއީ ދާއިރާއެއްގެ ގޮތުގައި ފާހަގަކޮށް މި ދާއިރާގައި އުޅޭ ފަރާތްތަކުގެ އަގުވަޒަން ކުރުމާއި މާލެ އާއި މުޅި ރާއްޖޭގެ މުސްތަގުބަލުގެ އިސްލާމީ ޝަހުސިއްޔަތު ވަރުގަދަ ކުރުން ވެސް ހިމެނެ އެވެ.

މި މުބާރާތުން ވަނަ ތަކަށް އަންނަ ބައިވެރީންނަށް އިނާމު ދިނުމަށް ހަމަޖެހިފައިވާއިރު، 1446 ވަނަ އަހަރުގެ ރަމަޟާން މަހު މާލޭގެ ބޮޑެތި މިސްކިތް ތަކުގައި ހުކުރު ނަމާދުގެ ބަންގި ގޮވުމުގެ ފުރުސަތު ވެސް ދޭނެ ކަމަށް އިސްލާމިކް މިނިސްޓްރީން ބުންޏެވެ.