ހަލީލް ލަންކާގެ ބޮޑުވަޒީރާ ބައްދަލުކުރައްވައިފި

ފޮރިން މިނިސްޓަރު ޑރ. އަބްދުﷲ ހަލީލް ސްރީލަންކާގެ ބޮޑުވަޒީރު، ޑރ. ހަރީނީ އަމަރަސޫރިޔާއާ ބައްދަލުކުރައްވައިފި އެވެ.

މިނިސްޓަރު ހަލީލް، ލަންކާއަށް މިހާރު ކުރައްވަމުން ގެންދަވާ ރަސްމީ ދަތުރުގެ ތެރެއިން އެ ގައުމުގެ ބޮޑުވަޒީރުގެ އަރިހަށް މިއަދު ވަނީ އިހުތިރާމްގެ ޒިޔާރަތެއް ކުރައްވާފަ އެވެ.

މިއަދުގެ ބައްދަލު ކުރެއްވުމުގައި ހަލީލް ވަނީ ލަންކާއިން ރާއްޖެއަށް އެކި ދާއިރާ ތަކުން ދެމުން އަންނަ އެއްބާރުލުން ފާހަގަ ކުރައްވައި ހާއްސަކޮށް މީހުން ބިނާ ކުރުމަށް އެ ގައުމުން ފޯރުކޮށްދޭ އެހީތެރި ކަމަށް ޓަކައި ޝުކުރު އަދާ ކުރައްވައިފަ އެވެ.

އޭގެ އިތުރުން ލަންކާގައި ދިރިއުޅޭ ދިވެހީންނަށް އެ ގައުމުން ދެމުން އަންނަ އެހީތެރިކަމަށް ޓަކައި ވެސް މިނިސްޓަރު ޝުކުރު އަދާ ކުރެއްވި އެވެ.

މި ބައްދަލު ކުރެއްވުމުގައި ލަންކާގެ ބޮޑުވަޒީރު ވަނީ ދެ ގައުމުގެ ދެމެދުގައި މިހާރު އޮތް ގުޅުން އިތުރަށް ބަދަހިކޮށް، އެ ގޮތުގައި ދަމަހައްޓާނެ ކަމުގެ ޔަގީންކަން ދެއްވާފަ އެވެ.

މިނިސްޓަރުގެ މި ދަތުރުފުޅުގެ ތެރެއިން އިއްޔެ ވަނީ ލަންކާގެ ފޮރިން އެފެއާޒް، ފޮރިން އެމްޕްލޯއިމަންޓް އެންޑް ޓޫރިޒަމް އޮފް ސްރީ ލަންކާ، މިނިސްޓަރު ވިޖިތާ ހެރަތާ ވެސް ބައްދަލު ކުރައްވާފަ އެވެ.