މާލޭ ސަރަހައްދުގައި މަސްދަޅު ބަހާ ވަގުތަށް ބަދަލު ގެނެސްފި

ކުރިއަށް އޮތް ރޯދަ މަހު ކޮންމެ ގޭބިސީ އަކަށް ސަރުކާރުން އިނާޔަތެއްގެ ގޮތުގައި ދޭ މަސްދަޅު ކޭސް މާލޭ ސަރަހައްދުގައި ބަހަން މިއަދު ހަމަޖެއްސި ވަގުތަށް ބަދަލު ތަކެއް ގެނެސްފި އެވެ.

މި ބަދަލުން، ކުރިން މާލޭ ސިޓީ ކައުންސިލް މެދުވެރިކޮށް ބަހަން ނިންމާފައިވާ މަސްދަޅު ކޭސް، ބެހުމުގެ ކަންކަން ކުރިއަށް ގެންދާނީ ލޯކަލް ގަވާންމެންޓް މިނިސްޓްރީގެ ބެލުމުގެ ދަށުންނެވެ.

މަސްދަޅު ބަހާ ގަޑިއަށް އެސްޓީއޯއިން ގެނައި ބަދަލާއެކު، މިއަދު މެންދުރު 2:30 ގައި މަސްދަޅު ބަހަން ނިންމާފައި އޮތްއޮތުން ބަދަލުކޮށް ދެން އެ މަސައްކަތް ފަށާނީ ރޭގަނޑު 8:30 ގައެވެ. އަދި މިރޭ 11:00 އާ ހަމައަށް މަސްދަޅު ކޭސް ބެހުން ކުރިއަށް ގެންދާނެ އެވެ.

ކޮންމެ ގޭބީސީ އަކަށް ވެސް ދޫ ކުރާނީ 48 ދަޅުގެ މަސްކޭހެކެވެ.

މަސްދަޅުތައް ބަހާނީ ކަރަންޓު މީޓަރު ނަންބަރަށެވެ. ގާތްގަނޑަކަށް ރާއްޖޭގެ 80,000 އަށްވުރެ ގިނަ ގޭބީސީ ތަކަށް މި ކޭސްތައް ބަހާނެ އެވެ.

މިހާރު މަސްދަޅު ކޭސް ބެހުމަށް ހަމަޖެހިފައިވާ ސަރަހައްދުތަކަކީ މިފްކޯގެ އޮފީސް ކޮމްޕައުންޑް، ހެންވޭރު އެމްޓީސީސީ ސޯމިލް، ވިލިމާލެ ވެމްކޯ ސައިޓް، ހުޅުމާލެ، އުމަރު ޒާހިރު ބިލްޑިން، ހިޔާ ޓަވަރު 10، ޔޫތު ސެންޓަރު އިންނެވެ.

ހުކުރު ދުވަހު މަސްދަޅު ބެހުން ކުރިއަށް ނުގެންދާނެ އެވެ.

ނަމަވެސް ހޮނިހިރު ދުވަހު ހެނދުނު 10:00 އިން ހަވީރު 4:00 އަށް، ރޭގަނޑު 8:30 އިން 11:00 އަށް މަސްދަޅު ކޭސް ބެހުން ކުރިއަށް ގެންދާނެ އެވެ. އޭގެ އިތުރުން އާދިއްތަ އިން ފަށައިގެން ބުރާސްފަތި ދުވަހުގެ ނިޔަލަށް މެންދުރުފަހު 2:30 އިން ހަވީރު 6:00 އަށް، އަދި ރޭގަނޑު 8:30 އިން 11:00 އަށް މަސްދަޅު ދޫކުރާނެ އެވެ.