ހަނިމާދޫއަށް ޑުރަގު އެތެރެ ކުރާން އުޅެނިކޮށް އެއާޕޯޓުން ހައްޔަރުކޮށްފި

ހަނިމާދޫއަށް ޑުރަގު އެތެރެކުރާން އުޅުނު މީހުން --

ހދ. ހަނިމާދޫއަށް ވައިގެ މަގުން މަސްތުވާތަކެތި އެތެރެ ކުރަން އުޅުނު ބަޔަކު ހައްޔަރުކޮށްފި އެވެ.

ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅުވައިގެން ހިންގި އޮޕަރޭޝަނުގައި ހައްޔަރުކޮށްފައި ވަނީ، ނ. ވެލިދޫ މޯނިން ސަން، ފާތިމަތު ޝާހާ ހަސަން، 20، އާއި ކ. ގުރައިދޫ ނަލަވާ، ހުސައިން ޝާވިން، 22، އާއި ސ. ފޭދޫ ރަތްވިލާގެ، މުޙައްމަދު ރިލުވާން އަބްދުއްސައްތާރު، 22، އަދި ދ. ކުޑަހުވަދޫ މާހިލް، އަރުސަމް އަލީ ވަހީދު، 28، އެވެ.

ކުޅުދުއްފުށި ސިޓީ ޕޮލިހާއި ހަނިމާދޫ ޕޮލިސް އަދި އިންޓެލިޖެންސް ގުޅިގެން ރޭ ދަންވަރު ހިންގި މި އޮޕަރޭޝަނުގައި، ހަނިމާދޫ އެއާޕޯޓުން އެ މީހުން ހައްޔަރުކޮށް ބަލައި ފާސްކުރި އިރު މަސްތުވާތަކެތި ކަމަށް ބެލެވޭ ތަކެތި ފެނިފައިވާ ކަމަށް ފުލުހުން ބުންޏެވެ.

އެ މީހުންގެ އަތުން ނެގި މި ތަކެތީގެ ބަރުދަނަކީ 13.85 ގުރާމެވެ.

މި މައްސަލައިގައި ހައްޔަރު ކުރި މީހުންގެ ބަންދާ މެދު ގޮތެއް ނިންމުމަށް ހަނިމާދޫ މެޖިސްޓްރޭޓް ކޯޓަށް ހާޒިރު ކުރުމުން، ހަތަރު މީހުން ވެސް 30 ދުވަހަށް ބަންދު ކުރުމަށް އަމުރު ކޮށްފައިވެ އެވެ.

މި މައްސަލަ ފުލުހުން އަންނަނީ ތަހުގީގު ކުރަމުންނެވެ.

ފުލުހުން މަސްތުވާތަކެތި