ޅ. އަތޮޅުގައި އޮޕަރޭޝަނެއް ހިންގައި ޑުރަގާއެކު ބަޔަކު މީހުން ހައްޔަރުކޮށްފި

ޅ. އަތޮޅު ދެ ރަށެއްގައި ހިންގި މަސްތުވާތަކެތީގެ އޮޕަރޭޝަންތަކެއްގައި ތިން މީހުން ހައްޔަރުކޮށްފި އެވެ.

ފުލުހުން ބުނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަންގައި ހިންނަވަރުން ހައްޔަރުކޮށްފައިވަނީ މ. ނަލަހިޔާމަންޒިލް، ހަސަން މުނާޒް، 40، ކަމަށެވެ.

މި މަހުގެ 14 ވަނަ ދުވަހު ހިންގި އެ އޮޕަރޭޝަނުގައި އޭނާ ހައްޔަރުކޮށް، ހިންނަވަރުގައި އޭނާ ދިރިއުޅޭ ގެ ބަލައި ފާސްކުރި އިރު މަސްތުވާތަކެތި ކަމަށް ބެލެވޭ ތަކެއްޗާއި ފައިސާ ފެނިފައިވެ އެވެ. ފެނުނު މަސްތުވާތަކެތީގެ ވަގުތީ ބަރުދަނުގައި ހުރީ 66.02 ގުރާމެވެ.

އޭގެ އިތުރުން މި މަހުގެ 14 ވަނަ ދުވަހު ނައިފަރުގައި ހިންގި އޮޕަރޭޝަންތަކުގައި ހައްޔަރުކޮށްފައި ވަނީ އެ ރަށު ނަގިލިޖެހިގެ، އަލީ މުޙައްމަދުފުޅު، 54، އާއި ހަމަ އެރަށު  ޑޭޒީހިޔާ، އަޙްމަދު ވިއާމް، 26 އެވެ.

އަލީ މުޙައްމަދުފުޅު ހައްޔަރުކޮށް އޭނާއާ ގުޅުންހުރިކަމަށް ބެލެވޭ ދެ ތަނެއް ބަލައިފާސްކުރިއިރު ފަސް ދަޅު ބަނގުރާ ފެނިފައިވެ އެވެ. އަހުމަދު ވިއާމް ހައްޔަރުކޮށް އޭނާ ދިރިއުޅޭ ގެ ބަލައިފާސްކުރިއިރު މަސްތުވާތަކެތި ކަމަށް ބެލެވޭ ތަކެތި ފެނިފައިވެ އެވެ. މި ތަކެތީގެ ވަގުތީ ބަރުދަނުގައި ހުރީ 12 ގުރާމެވެ.

މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަސަން މުނާޒްގެ 15 ދުވަހަށް ބަންދުކުރުމަށް ވަނީ އަމުރުކޮށްފައެވެ. އަލީ މުޙައްމަދުފުޅުގެ ބަންދަށް ދިން ދެ ދުވަސް ހަމަވެގެން ދެ ވަނަ ފަހަރަށް ކޯޓަށް ހާޒިރުކުރުމުން ފަސް ދުވަހަށް ބަންދު ކުރުމަށް ވަނީ އަމުރުކޮށްފަ އެވެ. އަހުމަދު ވިއާމް ގެ ބަންދަށް ކޯޓުން ދިނީ 12 ދުވަހެވެ.

ތިން މީހުން ވެސް ހައްޔަރުކޮށްފައި ވަނީ ކޯޓު އަމުރުގެ ދަށުންނެވެ. މި މައްސަލަތައް ފުލުހުން އަންނަނީ ތަހުގީގު ކުރަމުންނެވެ.