މީހުން ވާނުވާގައި ބެއިތިއްބުމަކީ މި ސަރުކާރުގެ ވިސްނުމެއް ނޫން: އިހުސާން

ޝަރީއަތް ނިމެންދެން ބަންދުކޮށް މީހުން ވާނުވާގައި އެންމެ ދުވަހަކު ވެސް ބެއިތިއްބުމަކީ މި ސަރުކާރުގެ ވިސްނުމެއް ނޫން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

އެ މަނިކުފާނު މިފަދައިން ވިދާޅުވެފައި ވަނީ ވަޒީރުންނާ ސުވާލު ކުރުމަށް ރައީސް އޮފީހާއި ޕީއެސްއެމް ގުޅިގެން ކުރިޔަށް ގެންދާ "އަހާ" ފޯރަމްގައި ވާނުވާގެ މައްސަލަ އަށް ނިމުމެއް އަންނާނީ ކޮން އިރަކުންތޯ އާންމު ރައްޔިތަކު ކުރި ސުވާލެއްގެ ޖަވާބުގަ އެވެ.

މިނިސްޓަރު އިހުސާން ވިދާޅުވީ އެންމެ ދުވަހަކު ވެސް ހުކުމެއްގައި ނޫން ގޮތަކަށް ޖަލުގެ ތޭރި ތަކުގައި މީހަކު ބެހެއްޓުމަކީ ރައީސް ޑރ މުޙައްމަދު މުއިއްޒުގެ ވިސްނުންފުޅު ނޫން ކަމަށާއި އެ މަނިކުފާނު ބޭނުންފުޅު ވަނީ ވީހާ ވެސް އަވަހަކަށް މި މައްސަލަ އަށް ހައްލު ހޯދައިދިނުން ކަމަށެވެ.

މުއްދަތެއް ނެތް ގޮތަށް ގިނަ ދުވަހު މީހުން ތިބެންޖެހޭ މައިގަނޑު ސަބަބަކީ، ޖިނާއީ މުޅި އަދުލުގެ ނިޒާމުގެ ތެރެއިން ލަސްވާ ލަސްވުން ކަން މިނިސްޓަރު ފާހަގަ ކުރެއްވި އެވެ. އެހެންކަމުން ވާނުވާގައި ތިބޭ މީހުންގެ މައްސަލަ ތަކުގެ ތަހުގީގު ގާނޫނުގައިވާ މުއްދަތުގެ ތެރޭގައި ނިންމާ ޕްރޮސިކިއުޓާ ޖެނެރަލްގެ އޮފީހަށް ފޮނުވުމުގެ މަސައްކަތް ވަރަށް ބާރަށް ކުރަމުން އަންނަ ކަމަށް ވިދާޅުވި އެވެ.

"މިހާރު އަޅުގަނޑަށް ކެރިގެން ދަންނަވަން ކެރިދާނެ ފުލުހުންގެ ތަހުގީގު މިހާތަނަށް ނުވާހާ އަވަސް އަޅުގަނޑުމެން ކޮށްފިން، އަދި ކުރިއަށް ތަނުގައި ބަލާނަން މިއަށްވުރެ ވެސް އަވަސް ކުރެވޭތޯ، އެންމެ ދުވަހަކު ވެސް ހުކުމެއްގައި ނޫން ގޮތަކަށް ޖަލުގެ ތޭރި ތަކުގައި ބެހެއްޓުމަކީ އަޅުގަނޑުމެންގެ ވިސްނުމެއް ނޫން. އެކަން ހުއްޓާލާނަން، ތަހުގީގު ބަންދުގައި ދެން ލަހެއް ނުވާނެ،" އެ މަނިކުފާނު ވިދާޅުވި އެވެ.

އެ މަނިކުފާނު ވިދާޅުވީ ކުރިމިނަލް ކޯޓަށް ހާއްސަ ކޮށްގެން ހުޅުމާލޭގައި އަޅައި އިމާރާތުގެ މަސައްކަތް ކުރިއަށް އޮތް ދެތިން މަސް ތެރޭގައި ނިންމައި އެތަން ކޯޓާއި ހަވާލުކުރާނެ ކަމަށެވެ. އަދި މިހާރުވެސް 12 ގާޒީން މަސައްކަތް ކުރައްވަމުން ގެންދަވަނީ އެންމެ ކޯޓު ރޫމެއްގައި ކަމަށް އިހުސާން ވިދާޅުވި އެވެ.

"އެ ހިސާބުން ވާނުވާގަ ޖަލުގެ ތޭރިތަކުގެ ތެރޭގައި ތިބި ހުރިހާ ކުދިންނަށް އަވަސް ނިޔާއެއް ލިބި، އެއީ ޝަރުއީ ހުކުމެއްގައި ޖަލަށް ދާންޖެހޭ މީހުން ޖަލަށް، ނޫނީ ސަލާމަތް ކުރެވޭ މީހުން ސަލާމަތް ކުރެވިގެންދާނެ، އެ ހިސާބުން އަޅުގަނޑުމެން ވާނުވާ އޭ މި ކިޔާ މައްސަލަ އެއްކޮށް ހައްލުވެގެންދާނެ ކަމަށް،" އެމަނިކުފާނު ވިދާޅުވި އެވެ.

ޝަރީއަތް ނިމެންދެން ބަންދުގައި މިހާރުވެސް ހަތަރު ފަސް އަހަރު ވެފައިވާ މީހުންވެސް އެބަތިބި ކަމަށާއި، މިއީ ގާނޫނީ ދައުލަތެއް ހިނގައި ތަނެއްގައި ވެގެންވާނެ ކަމެއް ނޫން ކަމަށް ވެސް މިނިސްޓަރު އިހުސާން ވިދާޅުވި އެވެ.

މީގެ އިތުރުން ވެސް ޝަރީއަތްތައް އަވަސް ކުރުމަށް ޓަކައި ޕީޖީ އޮފީހާއި ކޯޓު ތަކާއިއެކު އެޓާނީ ޖެނެރަލް އޮފީހުން ވަރަށް ގާތުން މަސައްކަތް ކުރަމުން އަންނަ ކަމަށް ވެސް އެމަނިކުފާނު ވިދާޅުވި އެވެ.