ވާނުވާ ބަންދުގައި ހުރި ބިދޭސީއަކު މަރުވެއްޖެ

މާފުށީ ޖަލު -- އަވަސް ފޮޓޯ

މާފުށީ ޖަލުގައި ޝަރީއަތް ނިމެންދެން ބަންދުކޮށްފައި ހުރި ނައިޖީރިއާގެ ރައްޔިތެއްކަމުގައިވާ އިމޭނުއަލް ޖޯންޕޯލް އޮކޮނާޗީ، 35، މިއަދު މަރުވެއްޖެ އެވެ.

ކަރެކްޝަނުން ބުނީ މިއަދު ހަވީރު އެ މީހާ ޔާޑުގައި އެހެން މީހުންނާއެކު ކުޅެން ހުއްޓާ ކުއްލިއަކަށް ވެއްޓުމުން، ވަގުތުން މާފުށީ ޖަލުގެ މެޑިކަލް ސެންޓަރަށް ގެންގޮސް އަވަސް ފަރުވާ ދިނުމަށްފަހު، ހަތަރު މިނެޓް ތެރޭ މާފުށީ ހޮސްޕިޓަލަށް ގެންގޮސް ފަރުވާ ދޭން ފެށި ކަމަށެވެ.

ޑޮކްޓަރު، އެމީހާ މަރުވި ކަމަށް ކަނޑައަޅާފައި ވަނީ 17:20 ހާއިރު ކަމަށެވެ.

އޭނާ އަކީ ރާއްޖެއަށް މަސްތުވާތަކެތި ގެންގުޅުމާއި، ބޭނުން ކުރުމާއި ވިޔަފާރި ކުރުމުގެ މައްސަލަ އެއްގައި ޝަރީއަތް ނިމެންދެން ބަންދު ކޮށްފައި ހުރި މީހެއް ކަމަށާއި އަދި އެ މީހާ އަކީ އެއްވެސް ދާއިމީ ބައްޔަކަށް ފަރުވާ ހޯދަމުން އަންނަ ފަރާތެއް ނޫން ކަމަށް ވެސް ކަރެކްޝަނުން ބުންޏެވެ.

އިމޭނުއަލް ޖޯންޕޯލް އޮކޮނާޗީ މަރުވުމުން ގުޅިގެން އެ ހިދުމަތުން ވަނީ އެކަން އިންސްޕެކްޓާ އޮފް ކަރެކްޝަނަލް ސާވިސްއަށާއި ފުލުހުންނަށާއި ހިއުމަން ރައިޓްސް ކޮމިޝަނަށާއި ނެޝަނަލް އިންޓެގްރިޓީ ކޮމިޝަން އަދި ޕްރޮސެކިއުޓާ ޖެނެރަލްގެ އޮފީހަށް އަންގާފަ އެވެ.

ކަރެކްޝަން ސާރވިސް