ކޯރާޑިއަކުން މީހަކަށް ހަމަލާ ދިން ދެ މީހުން ބަންދުކޮށްފި

ކޯރާޑިއަކުން މީހަކަށް ހަމަލާ ދިން ދެމީހުން -- ފޮޓޯ/ ޕޮލިސް

ހުޅުމާލޭގައި ކޯރާޑީއަކުން މީހަކަށް ހަމަލާ ދިން ދެ މީހުން ބަންދު ކުރުމަށް ކްރިމިނަލް ކޯޓުން އަމުރުކޮށްފި އެވެ.

ފުލުހުން ބުނީ ހުޅުމާލޭ ބޯގަންވިލާ މަގުގެ ރެހެންދި ޓާފް ދަނޑުގެ ހުޅަނގު ފަޅީގައި މަޑުކޮށްގެން ހުރި މީހަކަށް ސައިކަލެއްގައި އައި ދެ މީހަކު ހަމަލާދީފައިވާ މައްސަލައެއް ރޭ 23:35 ހާއިރު ރިޕޯޓުކޮށްފައިވާ ކަމަށެވެ.

މި މައްސަލައާ ގުޅުވައިގެން ފުލުހުންގެ ބެލުމުގެ ދަށަށް ގެންގޮސްފައި ވަނީ ގދ، ފިއޯރީ، ހީނާމާގޭ، ރުސްތުމް އިބްރާހީމް، 25، އަދި ބ. ގޮއިދޫ، ފިނިފެންމާގެ، ސައިފްﷲ ފައިސަލް، 19، އެވެ.

ފުލުހުން މިއަދު ބުނީ މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ރުސްތުމް، ތިން ދުވަހަށް އަދި ސައިފުﷲ ފައިސަލް، ތަހުގީގު ނިމެންދެން ބަންދު ކުރުމަށް ކުރިމިނަލް ކޯޓުން އަމުރުކޮށްފައިވާ ކަމަށެވެ.

މާރާމާރީގައި އަނިޔާވި މީހާ ހުޅުމާލޭ ހޮސްޕިޓަލުގައި ފަރުވާ ދިނުމަށް ފަހު މިހާރު ވަނީ ދޫކޮށްލާފައި ކަމަށް ފުލުހުން ބުންޏެވެ. އަދި މާރާމާރީގައި ހަމަލާ ދީނީ ކޯރާޑީއަކުން ކަމަށް ވެސް ބުންޏެވެ.

މި މައްސަލަ ފުލުހުން އަންނަނީ ތަހުގީގު ކުރަމުންނެވެ.

ފުލުހުން މާރާމާރީ