ރަސްމީ ދަތުރުޅެއްގައި ނައިބު ރައީސް ޔޫއޭއީއަށް

ނައިބު ރައީސް ޔޫއޭއީއަށް ވަޑައިގަންނަވާ ފްލައިޓުގައި --

ނައިބު ރައީސް ހުސައިން މުޙައްމަދު ލަތީފް، "ވޯލްޑް ގަވަމަންޓްސް ސަމިޓް 2025"ގައި ބައިވެރިވެވަޑައިގަތުމަށް ކުރައްވާ ރަސްމީ ދަތުރުފުޅެއްގައި ޔުނައިޓެޑް އެރެބް އެމިރޭޓްސް (ޔޫއޭއީ) އަށް ފުރާވަޑައިގެންފި އެވެ.

ޔޫއޭއީގައި ފެބްރުއަރީ މަހުގެ 11 އިން 13އަށް ބާއްވަން ހަމަޖެހިފައިވާ މި ސަމިޓް ޝިއާރަކަށް ކަނޑައަޅާފައި ވަނީ، "ޝޭޕިންގ ފިއުޗާ ގަވަމަންޓްސް" އެވެ.

މި ސަމިޓްގެ މަގުސަދަކީ ސަރަހައްދުގެ ގައުމު ތަކާއި، ބައިނަލްއަގުވާމީ ޖަމާއަތް ތަކާއި، ވަކި ވަކި ފަރުދުންގެ މެދުގައި އެއްބާރުލުން އިތުރުކޮށް، ކުރިމަތިވާ ގޮންޖެހުން ތަކަށް ހައްލުތައް ހޯދުމެވެ.

މި ސަމިޓްގެ މޫސުމީ ބަދަލު ތަކާއި ބެހޭ ފޯރަމްގައި ނައިބު ރައިސް، ވާހަކަފުޅު ދައްކަވާނެ އެވެ. މީގެ އިތުރުން އެ މަނިކުފާނު ސަމިޓްގެ ބައެއް ބައިވެރިންނާއެކު ބައްދަލުވުންތައް ބާއްވަވާނެ އެވެ.

‎"ވޯލްޑް ގަވަމަންޓްސް ސަމިޓް 2024" ގައި ރައީސް ޑރ. މުޙައްމަދު މުއިއްޒު ބައިވެރިވެވަޑައިގެން، ރާއްޖޭގެ ކުރިމަގުގެ ތަސައްވުރާއި، އެ ތަސައްވުރުގައި ދެމެހެއްޓެނިވި ތަރައްގީގެ ދައުރާއި ބެހޭގޮތުން ވަނީ ވާހަކަފުޅު ދައްކަވާފަ އެވެ.

ނައިބު ރައީސް ޙުސައިން މުޙައްމަދު ލަތީފް