އުތީމު ރައްޔިތުންގެ ކަންބޮޑުވުންތައް ހައްލު ކުރަން މަޝްވަރާ ކޮށްފި

ރައީސް އުތީމު ކައުންސިލާ ބައްދަލުކުރެއްވުން --

ރައީސް ޑރ. މުޙައްމަދު މުއިއްޒު، ހއ. އުތީމު ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި މުއައްސަސާ ތަކުގެ އިސްވެރީންނާ ބައްދަލުކުރައްވައި ރައްޔިތުންނަށް ބޭނުންވާ ކަންކަމާއި ރައްޔިތުންގެ ކަންބޮޑުވުންތަކާ ގުޅޭގޮތުން މަޝްވަރާ ކުރައްވައިފި އެވެ.

އުތީމު ކައުންސިލް އިދާރާގައި މިއަދު ހަވީރު ބޭއްވި މި ބައްދަލުކުރެއްވުމުގައި އުތީމު ކައުންސިލުން، އެ ރަށަށް ދިމާވެފައިވާ ރަށް ގިރުމުގެ މައްސަލަ އާއި އުތީމު، އުތީމުގެ ގޮތުގައި ބާއްވައިގެން ރަށުން ދިރިއުޅުމަށް ބިން ދޫކުރުމުގައި ހުރި ގޮންޖެހުންތައް ފާހަގަކޮށް ކައިރި އެހެން ރަށެއް އުތީމުގެ އިހުތިސޯސްގައި ހިމަނައިދިނުމަށް އެދެފަ އެވެ.

އަދި ރަށުގެ ސިއްހީ މަރުކަޒުގެ ފެންވަރު ރަނގަޅު ކުރުމާއި، ރަށުގައި ކުނިކޮއްޓެއް ގާއިމު ކުރުމަށް ދިމާވެފައިވާ ގޮންޖެހުން ހިއްސާ ކުރި އެވެ.

މީގެ އިތުރުން އުތީމު ގަނޑުވަރުގެ އާސާރީ ދިދަ ދަނޑި ހަލާކުވެފައި ހުރުމާއި ގަނޑުވަރަށް ޓްރީޓްމަންޓް ނުދެވި ގިނަ ދުވަސްވެފައިވާ ކަމުގެ ކަންބޮޑުވުން ކައުންސިލުން ރައީސްއާ ހިއްސާ ކުރި އެވެ.

މިއަދުގެ ބައްދަލު ކުރެއްވުމުގައި ރައީސް ވަނީ ކައުންސިލުން ފާހަގަ ކުރި ކަންކަން ބައްލަވާނެ ކަމުގައި ވިދާޅުވެފަ އެވެ. އަދި ޖުމްލަ ގޮތެއްގައި ފާހަގަ ކުރި ކަންކަމަށް ހައްލު ހޯއްދަވައިދެއްވުމަށް މަސައްކަތްކޮށްދެއްވާނެ ކަމުގައި އެ މަނިކުފާނު ވިދާޅުވި އެވެ.

ރައީސް ޑރ މުޙައްމަދު މުޢިއްޒު