އޭސީސީން ތިނަދޫ ކައުންސިލަށް ވަދެ ވައްކަންކުރި ކަމަށް ތުހުމަތު ކޮށްފި

ތިނަދޫ ކައުންސިލުން ވައްކަންކޮށްފި ކަމަށް ވަނީ ތުހުމަތުކޮށްފައި -- ފޮޓޯ/ ތިނަދޫ ކައުންސިލް

ތިނަދޫ ސިޓީ ކައުންސިލްގެ ގިނަ އަދަދެއްގެ ތަކެތި އޭސީސީގެ ނަމުގައި އައި ބަޔަކު ވަގަށް ނަގައިފި ކަމަށް ތުހުމަތުކޮށްފި އެވެ.

އެ ސިޓީގެ މޭޔަރު ސައުދު އަލީއަށް ކުރާ ކޮރަޕްޝަންގެ ތުހުމަތު ތަހުގީގު ކުރުމަށް އެންޓި ކޮރަޕްޝަން ކޮމިޝަން (އޭސީސީ)ގެ ތަހުގީގު ޓީމުން ކައުންސިލަށް ވަދެފައި ވަނީ އިއްޔެ ހެނދުނެވެ. އަދި އެ ތަނުގައި ހުރި މި ތަހުގީގަށް ބޭނުންވާނޭ ކިޔެކިޔުންތައް ހޯދުމުގެ މަސައްކަތް އެ ޓީމުން ކުރި އެވެ.

ކައުންސިލްގެ ގިނަ އަދަދެއްގެ ތަކެތި އޭސީސީގެ ނަމުގައި އައި ބަޔަކު ވަގަށް ނަގާފައިވާ ކަމަށާއި އަދި މި މައްސަލަ ފުލުހުންނަށް ހުށަހެޅި ބަލަމުން ދާތީ ކައުންސިލްގެ ބައެއް ހިދުމަތްތައް މެދު ކެނޑިފައިވާ ކަމަށް ތިނަދޫ ކައުންސިލުން ކުރި ފޭސްބުކް ފޯސްޓެއްގައި ބުނެފައިވެ އެވެ.

ތިނަދޫ އަކީ ސިޓީއެއްގެ ދަރަޖަ ލިބުމުގެ ޝަރުތު ހަމަ ނުވާ ރަށަކަށްވެފައި މަރުވެފައިވާ މީހުންނާއި ކައިރި ރަށްރަށުގެ ބައެއް މީހުންނަކީ އެ ރަށުގެ ރަށްވެހީން ކަމުގައި ހަދައި، 10،000 މީހުން ހަމަވާ ސައްހަނޫން ލިސްޓެއް ތައްޔާރުކޮށް ދައުލަތުގެ އިދާރާ ތަކަށް ހުށަހެޅި މައްސަލައެއް ފަޅާއަރާފައިވާއިރު، އެ ކަމުގެ އެންމެ ބޮޑު ތުހުމަތު އަމާޒު ވަނީ މޭޔަރު ސައުދަށެވެ.

އެހެންކަމުން ތިނަދުއަށް ދީފައިވާ ސިޓީގެ ދަރަޖަ ބާތިލް ކުރުމަށް ސިވިލް ކޯޓަށް މިހާރު ވަނީ މައްސަލަ ހުށަހަޅާފަ އެވެ.

އޭސީސީ ތިނަދޫ ކައުންސިލް