މީޑިއާގެ މިނިވަންކަމަށް ހުރަހެއް ނާޅާނަން، މިއުޅެނީ ދޯހަޅި މުއައްސަސާތައް ރިފޯމް ކުރަން: ނާޒިމް

ނޫސްވެރިކަމާ އިންޓަނެޓް ރެގިއުލޭޓް ކުރާ ބިލެއް ތައްޔާ ކުރައްވަނީ މީޑިއާގެ މިނިވަން ކަމަށް ހުރަސް އަޅާން ނޫން ކަމަށާއި އެ ބިލުގެ ބޭނުމަކީ ދޯހަޅި މުއައްސަސާތައް ރިފޯމް ކުރުން ކަމަށް ރައްޔިތުންގެ މަޖިލީހުގެ ނައިބު ރައީސް އަދި ޕީއެންސީގެ މެންބަރު އަހުމަދު ނާޒިމް ވިދާޅުވެއްޖެ އެވެ.

ނާޒިމް ނެރުއްވި ބަޔާނެއްގައި މިހެން ވިދާޅުވީ ސަން މީޑިއާގެ ޕްރޮގްރާމެއްގައި މީޑިއާ ރެގިއުލޭޓް ކުރުމާބެހޭ ގޮތުން އެ މަނިކުފާނު ދެއްކެވި ވާހަކަފުޅުގެ މާނަ އޮޅޭ ގޮތަށް ބައެއް މީޑިއާތަކުގައި ރިޕޯޓު ކުރުމުންނެވެ.

ނާޒިމް ވިދާޅުވީ ރާއްޖޭގައި މީޑިއާތައް ރެގިއުލޭޓް ކުރަން ދެ މުއައްސަސާއެއް އުފައްދާފައި އޮތް ނަމަވެސް އެ ދެ މުއައްސަސާ ވެސް ރަނގަޅަށް މަސައްކަތް ނުކުރާ ކަން ހުދު މީޑިއާ ތަކުން ވެސް ގަބޫލު ކުރާނެ ކަމަށެވެ.

މި ދެ މުއައްސަސާ އަށް މިދިޔަ އަހަރު އެކަނި ވެސް ދައުލަތުގެ ބަޖެޓުން 18 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަން ފާހަގަ ކުރައްވަމުން ނާޒިމް ވިދާޅުވީ އެހެންކަމުން މަގުސަދަކީ މިފަދަ ގޮތްގޮތަށް ހުރި މުއައްސަސާތައް ރިފޯމް ކުރުން ކަމަށެވެ.

މި ފަހަކަށް އައިސް ސޯޝަލް މީޑިއާގެ އެކި މަންސަތައް ޒުވާނުން ބޭނުންކުރާ މިންވަރު އިތުރުވެފައިވާ ކަން ނާޒިމް ފާހަގަ ކުރެއްވި އެވެ. އަދި  މުނިފޫހިފިލުވުމުގެ އިތުރުން ޒުވާނުން އާމްދަނީ ހޯދުމާއި، ޝުއޫރުތައް ފާޅު ކުރާ އެންމެ ވަރުގަަދަ ތަނަކީ ސޯޝަލް މީޑިއާ އަށް ވެފައިވާ ކަމަށް ވެސް ވިދާޅުވި އެވެ.

އެހެންވެ އެ މަންސަތައް ރެގިއުލޭޓް ކުރުމަކީ މުހިންމު ކަމެއް ކަމަށް ހުރިހާ އެންމެން ވެސް އެއްބާސްވާނެ ކަމަށާއި، އެއީ އެއްވެސް ހާލެއްގައި އެ ފަދަ މަންސަތައް ބްލޮކްކޮށް ނުވަަތަ މީޑިއާގެ މިނިވަންކަން ނިގުޅައިގަތުން ނޫން ކަމަށް ނާޒިމް ވިދާޅުވި އެވެ.

އެހެންވެ އެ މަންސަތައް ރެގިއުލޭޓް ކުރުމަކީ މުހިންމު ކަމެއް ކަމަށް ހުރިހާ އެންމެން ވެސް އެއްބާސްވާނެ ކަމަށާއި، އެއީ އެއްވެސް މިންވަރަކަށް އެ ފަދަ މަންސަތައް ބްލޮކްކޮށް ނުވަަތަ މީޑިއާގެ މިނިވަންކަން ނިގުޅައިގަތުން ނޫން ކަމަށް ނާޒިމް ވިދާޅުވިއެވެ.

"މިފަދަ މަންސަތައް ބޭނުން ކުރެވޭއިރު، އަނެކާގެ އަބުރާއި، އިއްޒަތް ވެސް އެއީ އޮންނާނެ އެއްޗެއް ކަން ދެެނެގަންނަން އެބަ ޖެހެ އެެވެ. އަނިޔާ ލިބޭ ފަރާތުން، އިންސާފު ހޯދުމަށް ދޮރުގައި ޓަކިޖަހާއިރު، އިންސާފު ހޯދަައިދިނުމަށް އޮންނާނެ ވަސީލަތަކީ ކަޅާއި ހުދުން ލިޔެފައި އޮންނަ ގާނޫނު ކަމާއި، އަދި މިވަގުުތު އެފަދަ ގާނޫނެއް ދިވެހި ރާއްޖޭގައި ނެތްކަން އެއީ ދެބަސްވެވެން ނެތް ހަގީގަތެކެވެ،" އެމަނިކުފާނުގެ ބަޔާނުގައިވެ އެވެ.

ނާޒިމް ވަނީ މިފަދަ ކަންކަމުގައި ރައްޔިތުންނަށް ހަގީގަތް އޮޅޭ ފަދަ ފިތުނަވެރި ގޮތަކަށް ހަބަރާއި މައުލޫމާތު ނުފެތުރުމަށް ރާއްޖޭގެ ހުރިހާ މީޑިއާ ތަކަކަށް އިލްތިމާސް ކުރައްވާފަ އެވެ.