ކައުންސިލްތަކުން އިސް ނަގައިގެން ރަށުގެ ތަރައްގީއަށް މަސައްކަތް ކުރުމަކީ ބަލައިގަންނަ ކަމެއް: ރައީސް

ކައުންސިލްތަކުން އިސްނަގައިގެން ރަށުގެ ތަރައްގީ އަށް މަސައްކަތްކުރުމަކީ ވަރަށް ބޮޑަށް ބަލައިގަންނަ ކަމެއް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިިކުފާނު މިހެން ވިދާޅުވީ ވާދޫ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި ރަށުގެ މުއައްސަސާ ތަކުގެ އިސްވެރިނާއެކު މިއަދު ބޭއްވި ބައްދަލު ކުރެއްވުމުގަ އެވެ.

މި ބައްދަލުވުމުގައި ކައުންސިލުން ވަނީ ރަށުގެ މުސްތަގުބަލަށް ޓަކައި އިއާދަ ކުރަނިވި ހަކަތައިގެ މަޝްރޫއު ކުރިއަށްދާ ގޮތް ހިއްސާކޮށް އެ މަސައްކަތް ފުރިހަމަ ކުރުމަށް ބޭނުންވާކަން ފާހަގަ ކުރައްވާފަ އެވެ.

މީގެ އިތުރުން ރަށް ގިރުމުގެ މައްސަލައަށް އަވަސް ހައްލެއް ބޭނުންވާ ކަމަށާއި، ރަށުގެ ސިއްހީ މަރުކަޒަށް ބޭނުންވާ ހިދުމަތް ތަކާއި، ރަށުގެ ޒުވާނުންނަށް ހާއްސަކޮށް ކުޅިވަރުގެ ދާއިރާ ކުރިއެރުވުމަށް ބޭނުންވާ ކަންކަން ކައުންސިލުން ހިއްސާ  ކުރި އެވެ. އަދި ރަށަށް އަރައި ފޭބުމުގައި ހުރި ދަތިކަން ފާހަގަކޮށް ބަނދަރުގެ މަސައްކަތް އަވަހަށް ފުރިހަމަކޮށްދިނުމަށް އެދިފައިވެ އެވެ.

ކައުންސިލްގެ ވާހަކަތައް އައްސަވައި ރައީސް ވިދާޅުވީ އިއާދަ ކުރަނިވި ހަކަތަ ބޭނުންކުރުން އިތުރު ކުރުމަކީ ސަރުކާރުގެ މުހިންމު އަމާޒެއް ކަމަށެވެ.

އަދި ވާދޫގައި މިހާރު ކުރިއަށްދާ ސޯލާ ޕްރޮޖެކްޓް ނިމޭއިރު މުޅި ރަށުގެ ކަރަންޓުގެ މައްސަލައަށް ޖުމްލަ ގޮތެއްގައި ފުރިހަމަ ހައްލެއް ލިބިގެންދިއުމަށް ބޭނުންވާ ކަމުގައި އެމަނިކުފާނު ވިދާޅުވިއެވެ.

މި ބައްދަލުކުރެއްވުމުގައި ކައުންސިލުން ފާހަގަކުރި ކަންކަން ބައްލަވާނެކަމުގައި ރައީސުލްޖުމްހޫރިއްޔާ ވިދާޅުވި އެވެ.