ޝުއައިބު އަވަހާރަވުމަކީ ޝަރުއީ ދާއިރާއަށް ލިބުނު ފުން ހިތާމައެއް: ރައީސް

ހައި ކޯޓުގެ ކުރީގެ ފަނޑިޔާރު ގދ. ހޯޑެއްދޫ، އުފަބް، ޝުއައިބު ހުސައިން ޒަކަރިއްޔާ އަވަހާރަވުމަކީ ރާއްޖޭގެ ޝަރުއީ ދާއިރާއަށް ލިބުނު ފުން ހިތާމައެެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރާއްޖޭގެ ހައި ކޯޓުގައި11  އަހަރަށްވުރެ، ގިނަ ދުވަހު ހިދުމަތް ކުރައްވާފައިވާ ޝުއައިބު، އުމުރުފުޅުން 55 ތިން އަހަރުގައި އަވަހާރަވީ މިއަދު ހަވީރު އެވެ.

އޭނާ އަވަހާރަވީއިރު ގެންދެވީ ކެންސަރު ބައްޔަށް ފަރުވާ ހޯއްދަވަމުންނެވެ.

ޝުއައިބު އަވަހާރަވުމާ ގުޅުވައި ރައީސުލްޖުމްހޫރިއްޔާ ޑރ. މުޙައްމަދު މިރޭ ޓްވިޓާގައި ވިދާޅުވީ  ޖަސްޓިސް (ރިޓަޔަޑް) އަލްއުސްތާޒު ޝުއައިބު ހުސައިން ޒަކަރިއްޔާ އަވަހާރަވުމަކީ، ދިވެހި ގައުމަށް އަދި ވަކީން ހާއްސަކޮށް ރާއްޖޭގެ ޝަރުއީ ދާއިރާއަށް ލިބުނު ފުން ހިތާމައެއް ކަމަށެވެ.

"އެމަނިކުފާނު ވަނީ 23 އަހަރަށް ވުރެ ދިގު މުއްދަތަކަށް، ފަނޑިޔާރު ކަމުގައި ގައުމަށް މުހިންމު ހިދުމަތްތަކެއް ކުރައްވާފަ. ޝަރީއަތާއި ގާނޫނުގެ ދާއިރާއިން ދަރިވަރުން ބިނާ ކުރައްވައި ތަރުބިއްޔަތުކޮށްދެއްވި އެދުރެއްގެ ގޮތުގައިވެސް އެމަނިކުފާނަކީ ޚާއްޞަ ޚިދުމަތްތެރިއެއް،" ރައީސްގެ ޓްވީޓުގައިވެ އެވެ.

މާތް ﷲ މަރުހޫމް ޝުއައިބު ހުސައިން ޒަކަރިއްޔާގެ އާއިލާއަށް ކެތްތެރިކަން ދެއްވުމަށާއި މައްޔިތާގެ ފާފަ ފުއްސަވައި ސުވަރުގޭގެ މަތިވެރި ނިއުމަތް މިންވަރު ކުރެއްވުމަށް ރައީސް ވަނީ ދުއާ ކުރައްވާފަ އެވެ.

ޝުއައިބު ވަނީ ރާއްޖޭގެ ޝަރުއީ ދާއިރާގެ ގިނަ މަގާމު ތަކެއް ފުރުއްވާފަ އެވެ.

އެ މަނިކުފާނު އަދާ ކުރެއްވި މަގާމު ތަކުގެ ތެރޭގައި ޖަސްޓިސް މިނިސްޓްރީގެ ލީގަލް އޮފިސަރު ކަމާއި ހާއްސަ ގާޒީ ކަމާއި ކުޑަކުދިންނާ ބެހޭ ކޯޓުގެ އިސް ގާޒީ ކަމުގެ އިތުރުން ފެމިލީ ކޯޓާ މަދަނީ ކޯޓުގެ ގާޒީކަން ކުރެއްވި އެވެ.

ރާއްޖޭގެ ހައި ކޯޓުގައި ޝުއައިބު 11 އަހަރަށްވުރެ، ގިނަ ދުވަހު ހިދުމަތް ކުރެއްވި އެވެ.

ފަނޑިޔާރު ޝުއައިބު ހުސެއިންގެ ޖަނާޒާ ބޭއްވީ އާ ސަހަރާގަ އެވެ. ކަށުނަމާދު ކުރީ މިރޭ 23:00ގަ އެވެ.