ޑިވެލޮޕްމެންޓް ބޭންކު ހުޅުވީ ވަގުތުން ހިދުމަތް ދޭން ފަށާ ގޮތަކަށް ނޫން: ސައީދު

މޯލްޑިވްސް ޑިވެލޮޕްމެންޓް ބޭންކު ހުޅުވީ ވަގުތުން ހިދުމަތް ދޭން ފަށާ ގޮތަށް ނޫން ކަމަށާއި އެ މަސައްކަތް ކަނޑައަޅާފައިވާ ޝެޑިއުލާ އެއްގޮތަށް ކުރިއަށް އެބަދާ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެ އެވެ

ޑިވެލޮޕްމެންޓް ބޭންކުގެ ހިދުމަތްތައް ކުރިއަށް ދަނީ ތިން މަރުހަލާ އަކަށް ބަހާލައިގެން ކަން ފާހަގަ ކުރައްވައި ސައީދު ވިދާޅުވީ އެގޮތުން މިވަގުތު ކުރިއަށް ދަނީ އެ ތަނުގެ އިންސްޓިޓިއުޝަނަލް ސެޓަޕްގެ މަސައްކަތް ކަމަށެވެ.

ސައީދު ވިދާޅުވީ ޑީބީއެމްގެ ވިޔަފާރި މޮޑެލްގައި އިސްކަން ދެނީ އިންސްޓިއުޝަނަލް އިންވެސްޓަރުންނާއި ބޮޑެތި އުމްރާނި މަޝްރޫއު ތަކަށް ކަމަށާއި އަދި ފަހުގެ މަރުހަލާ އެއްގައި ރީޓެއިލް ހިދުމަތްތައް ތައާރަފު ކުރުމަށް ނިންމާފައިވާ ކަމަށެވެ.

މިނިސްޓަރު ވަނީ ޕަބްލިކް ފައިނޭންސް ބެލެހެއްޓުމުގައި ޒިންމާދާރުކަން ކުޑަ ސަރުކާރެއްގެ ކިބައިން ވާރުތަވި ނުތަނަވަސް ކަމުން އަރައި ގަނެވިފައިވާ ކަން ފާހަގަ  ކުރައްވާފަ އެވެ.

ޑިވެލްޕްމަންޓް ބޭންކް އޮފް މޯލްޑިވްސް އުފެއްދީ މިދިޔަ މޭ މަހުގެ 16ވަނަ ދުވަހުގަ އެވެ.

މި ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގުތިސާދީ އަދި އިޖުތިމާއީ ތަރައްގީއަށް އިންވެސްޓު ކުރުމާއި، އުމްރާނީ ތަރައްގީ އަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫއު ތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ހައްލު ކުރުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރު ކުރުމުގެ ބޭނުމުގައި އުފެއްދި ކުންފުންޏެކެވެ.

ޑިވެލޮޕްމަންޓް ބޭންކެއް އުފެއްދުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.