ޓާޓޫ ޔުނިވާސިޓީން ދިވެހިންނަށް ތައުލީމާއި ތަމްރީނު ފުރުސަތު ހޯދަން މަޝްވަރާ ކޮށްފި

ރައީސް މުއިއްޒު އެސްޓޯނިއާގެ ޓާޓޫ ޔުނިވާސިޓީގެ އޮފިޝަލުންނާ ބައްދަލު ކުރައްވަނީ --

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އެސްޓޯނިއާގެ ޓާޓޫ ޔުނިވާސިޓީއަށް މިއަދު ޒިޔާރަތްކުރައްވައިފި އެވެ.

ރައީސް އެ ޔުނިވާސިޓީއަށް ޒިޔާރަތް ކުރެއްވުމުން އެ މަނިކުފާނަށް މަރުހަބާ ވިދާޅުވީ ޔުނިވަރސިޓީގެ ރެކްޓާ ޕްރޮފެސަރު ޓޫމަސް އައްސެރް އެވެ.

މި ޒިޔާރަތުގައި، ޕްރޮފެސަރު ވަނީ ރައީސަށް ކެމްޕަހުގެ މުހިއްމު ސަރަޙައްދުތައް ދައްކަވާލައްވާފަ އެވެ. މީގެ އިތުރުން، އެ މަނިކުފާނު ވަނީ ޔުނިވާސިޓީގެ މެހެމާނުން ސޮއިކުރައްވާ ފޮތުގައި ސޮއި ކުރައްވާފަ އެވެ.

މި ބައްދަލުކުރެއްވުމުގައި، ރައީސް ވަނީ އެ ޔުނިވާސިޓީއާއެކު މަސައްކަތް ކުރެވިދާނެ ދާއިރާތަކާ ބެހޭގޮތުން ސުވާލު ކުރައްވާފަ އެވެ.

މީގެ ތެރޭގައި ދިވެހި ދަރިވަރުންނާއި، މުދައްރިސުންނާއި އަދި އެހެނިހެން ފަންނީ މާހިރުންނަށް ތައުލީމާއި، ދިރާސާ ކުރުމާއި އަދި ތަމްރީނުގެ ފުރުސަތު ތަކުގެ ވާހަކަ ހިމެނެއެވެ.

އޭގެ އިތުރުން ހާއްސަ ގޮތެއްގައި މަޝްވަރާތައް އަމާޒު ކުރައްވާފައި ވަނީ ރާއްޖޭގެ އާންމު ހިދުމަތް ތަކާއި ޑިޖިޓަލް އިންފްރާސްޓްރަކްޗާ ހަރުދަނާ ކުރުމަށް ޓަކައި ޔުނިވާސިޓީގެ ދިރާސާ ކުރުމުގެ ގާބިލުކަން ބޭނުންކުރެވިދާނެ ގޮތްތައް ބަލައި ދެނެގަތުމަށެވެ.

ޓާޓޫ ޔުނިވާސިޓީ އަކީ އުތުރު ޔޫރަޕްގެ އެންމެ ތާރީހީ އަދި އެންމެ ޝަރަފްވެރި ޔުނިވާސިޓީ ތަކުގެ ތެރޭގައި ހިމެނޭ ޔުނިވާސިޓީ އެކެވެ.

ރައީސް ޑރ މުޙައްމަދު މުޢިއްޒު