ރައީސް އެސްޓޯނިއާގެ ދެވަނައަށް އެންމެ ބޮޑު ސިޓީއަށް ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އެސްޓޯނިއާގެ ޓާރްޓޫ ސިޓީއަށް މިއަދު ވަޑައިގެންފި އެވެ.

ރައީސް އެ ގައުމުގެ ޓާރްޓޫ ސިޓީއަށް ވަޑައިގަތުމުން އެ މަނިކުފާނަށް މަރުޙަބާ ވިދާޅުވީ އެ ސިޓީގެ މޭޔަރު އަރުމަސް ކްލާސް އެވެ.

ޓާރްޓޫ ސިޓީގެ މޭޔަރު މިސްޓަރު އަރްމަސް ކްލާސް ވަނީ ރައީސްގެ އަރިހުގައި، ޓައުން ހޯލް ސްކޮޔާއަށް ޒިޔާރަތްކުރައްވައި، އެތަނުގެ ތާރީހީ މުހިންމުކަމާ ބެހޭ ގޮތުން ވަރަށް އަގުހުރި މައުލޫމާތު ތަކެއް ހިއްސާ ކުރައްވާފަ އެވެ.

މި ޒިޔާރަތުގައި ރައީސުލްޖުމްހޫރިއްޔާ ވަނީ މެހެމާނުން ސޮއި ކުރައްވާ ފޮތުގައި ސޮއި ކުރައްވާފަ އެވެ.

ޓާރްޓޫ ސިޓީއަކީ އެސްޓޯނިއާގެ ދެވަނަ އަށް އެންމެ ބޮޑު ސިޓީ އެވެ. ޓާޓޫ ޓައުން ހޯލަކީ ވިޔަފާރީގެ އިތުރުން މީހުން އާބާދު ވެފައިވާ މައިގަނޑު ސަރަހައްދު ވެސްމެ އެވެ.

ރައީސްގެ މި ޒިޔާރަތުގައި ޔުނިވާސިޓީ އޮފް ޓާރްޓޫއާއި، އެސްޓޯނިއަން ބަޔޯބޭންކާއި، އެސްޓޯނިއަން ނޭޝަނަލް މިއުޒިއަމް (އީއާރުއެމް) އަށް ޒިޔާރަތް ކުރެއްވުމަށް ވެސް ވަނީ ހަމަޖެހިފަ އެވެ.

ރައީސުލްޖުމްހޫރިއްޔާ އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅަކީ އެސްޓޯނިއާގެ ރައީސް، ޑރ. އަލާރް ކަރިސްގެ ދައުވަތަކަށް ކުރައްވާ ރަސްމީ ދަތުރުފުޅެކެވެ.

އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވަ އެވެ.