ޓްރާންސްފޯމަރުން ވައްކަން ކުރަން އުޅުނު މީހާގެ ވަނަވަރު ހާމަކޮށްފި

ޓްރާންސްފޯމަރުން ވައްކަން ކުރަން އުޅުނު އިބްރާހީމް ޒާލިފު --

ހުޅުމާލޭގައި ދެވަނަ ފޭހުގައި ހުންނަ ޓްރާންސްފޯމަރަކުން ވައްކަން ކުރަން އުޅުނު މީހަކު ހުއްޓުވަން މަސައްކަތް ކުރި ސްޓެލްކޯ މުވައްޒަފަށް ހަމަލާ ދިން މީހާގެ ވަނަވަރު އާންމުކޮށްފި އެވެ.

ފުލުހުން ބުނިގޮތުގައި މި މައްސައިގައި ހައްޔަރުކޮށްފައިވަނީ ށ. ބިލެއްފަހި ޗަބޭލީގެ، އިބްރާހީމް ޒާލިފް، 37، ކަމަށެވެ. މި މީހާ ފުލުހުންގެ ބެލުމުގެ ދަށަށް ގެންދިޔައީ ރޭ 9:50ހާއިރު އެވެ.

ޓްރާންސްފޯމަރު ތެރެއަށް ވައްކަން ކުރަން ވަދެ އޮތް ވަގުކަލޭގެ ވަނީ އެތަނަށް އެޓެންޑްވި ސްޓެލްކޯ މުވައްޒަފުގެ ބޮލުގައި ރެންޗަކުން ޖަހާ މާރާމާރީ ހިންގާފަ އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ، މުވައްޒަފު ބޮލުގައި ރެންޗުން ޖެހުމުގެ ސަބަބުން ދާއިމީ ނުކުޅެދުންތެރި ކަމަކުން ނުވަތަ މަރުގެ އެތިފަހަރަކުން އޭނާ ސަލާމަތްވީ ކިރިޔާ ކަމަށެވެ.

އެ މުވައްޒަފު ދެއްކި ހިތްވަރުގެ އަގުވަޒަން ކުރާނެ ކަމުގެ ޔަގީންކަން ދެއްވަމުން ފަހުމީ ވަނީ މުވައްޒަފުންނަށް ދިމާވާ އެފަދަ ނުރައްކާތައް ވަރަށް ސީރިއަސް ކަމެއްގެ ގޮތުގައި ހައްލު ކުރައްވާނެ ކަމުގެ ޔަގީންކަން ވެސް ދެއްވާފަ އެވެ.

މި މައްސަލައިގައި ޒާލިފުގެ އިތުރުން ދެވަނަ މީހަކުވެސް ހިމެނެ އެވެ. ނަމަވެސް އޭނާ އަދި ހައްޔަރެއް ނުކުރެވެ އެވެ.

ފުލުހުން އަންނަނީ މި މައްސަލަ ތަހުގީގު ކުރަމުންންނެވެ.

ފުލުހުން