ވަގެއް ހިފަން އުޅުނު ސްޓެލްކޯ މުވައްޒަފަކަށް ރެންޗަކުން ހަމަލާ ދީފި

މަގު ހިފަން އުޅުނު ސްޓެލްކޯ މުވައްޒަފަށް ހަމަލާދީފައި --

ހުޅުމާލޭގައި ހުރި ޓްރާންސްފޯމަރަކުން ވައްކަން ކުރަން އުޅުނު މީހަކު އަތުލައިގަންނަން މަސައްކަތް ކުރި ސްޓެލްކޯގެ މުވައްޒަފަކަށް ރެންޗަކުން މިރޭ ހަމަލާދީފި އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ، ހުޅުމާލޭގެ ޓްރާންސްފޯމަރަކަށް ގެއްލުންދީ އޭގެން ވައްކަން ކުރަން އުޅުނު މީހަކު އެ ކުންފުނީގެ މުވައްޒަފުން އަތުލައިގަނެފައިވާ ކަމަށެވެ. ވަގުކަލޭގެ ވަނީ އެތަނަށް އެޓެންޑްވި މުވައްޒަފުގެ ގައިގައި ރެންޗަކުން ޖަހާ މާރާމާރީ ހިންގާފައި ކަމަށް ވެސް އެމްޑީ ވިދާޅުވި އެވެ.

އޭނާ ވިދާޅުވީ މުވައްޒަފު ބޮލުގައި ރެންޗުން ޖެހުމުގެ ސަބަބުން ދާއިމީ ނުކުޅެދުންތެރި ކަމަކުން ނުވަތަ މަރުގެ އެތިފަހަރަކުން އޭނާ ސަލާމަތްވީ ކިރިޔާ ކަމަށެވެ.

އެ މުވައްޒަފު ދެއްކި ހިތްވަރުގެ އަގުވަޒަން ކުރާނެ ކަމުގެ ޔަގީންކަން ދެއްވަމުން ފަހުމީ ވަނީ މުވައްޒަފުންނަށް ދިމާވާ އެފަދަ ނުރައްކާތައް ވަރަށް ސީރިއަސް ކަމެއްގެ ގޮތުގައި ހައްލު ކުރައްވާނެ ކަމުގެ ޔަގީންކަން ދެއްވާފަ އެވެ.

ޓްރާންސްފޯމަރަށް ގެއްލުން ދިނުމާއި ގުޅިގެން ހުޅުމާލޭ ދެވަނަ ފިޔަވަހީގެ އެމްޕީއެލް ޓަވަރު ތަކުން ކަރަންޓުގެ ހިދުމަތް މެދުކެނޑިފައިވާ ކަން ފާހަކަ ކުރައްވައި ފަހުމީ ވިދާޅުވެފައި ވަނީ ވީ އެންމެ އަވަހަކަށް ކަރަންޓުގެ ހިދުމަތް މެދުކެނޑިފައިވާ ޓަވަރު ތަކަށް ކަރަންޓު ދިނުމުގެ މަސައްކަތް ކުރެވެމުންދާ ކަމަށެވެ.

އަދި ޓްރާންސްފޯމަރަށް ގެއްލުންދީ މާރާމާރީ ހިންގި މީހާ ފުލުހުންނާއި ހަވާލު ކުރެވިފައިވާ ކަމަށް އެމްޑީ ފައުމީ ވިދާޅުވި އެވެ.

ސްޓެލްކޯ