100 ރުފިޔާގެ އާ ނޫޓު، ބަދަލުތަކަކާއެކު އާދީއްތަ ދުވަހުން ފެށިގެން ދައުރުކުރަން ފަށާނެ

އަލަށް ނެރޭ 100 ރުފިޔާގެ ނޫޓް / ފޮޓޯ:އެމްއެމްއޭ

ބައެއް ބަދަލުތަކާއެކު އަލުން ޗާޕުކޮށްފައިވާ 100 ރުފިޔާގެ ނޫޓު އަންނަ އާދީއްތަ ދުވަހުން ފެށިގެން ދައުރުކުރަން ފަށާނެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

މި އާ ނޫޓުތަކުގައި ގެނެސްފައިވާ މައިގަނޑު ބަދަލުތަކުގެ ތެރޭގައި ދިވެހި ރުފިޔާގެ ނިޝާން ނޫޓުގެ ދެ ފަރާތުގައި ހިމެނުމާއި، ކުރީގެ ގަވަރުނަރު އަލީ ހާޝިމްގެ ސޮއި ހިމެނުން ހިމެނެއެވެ.

އާ ނޫޓުތަކުގައި ތާރީޚަކަށް ޖަހާފައިވަނީ 7 ޖުލައި 2024 (1 މުހައްރަމް 1446) އެވެ. އެމްއެމްއޭއިން އިތުރަށް ހާމަކޮށްފައިވާ ގޮތުގައި، އާ ނޫޓުތަކާ އެކު މިހާރު ބޭނުންކުރަމުންދާ 100 ރުފިޔާގެ ނޫޓުތައް ވެސް ދައުރުކުރެވެމުންދާނެއެވެ.

މިހާރު ރާއްޖޭގައި ބޭނުންކުރަމުންދަނީ މިނިވަންކަމަށް 50 އަހަރު ފުރުމާ ދިމާކޮށް 2016-2017 ގައި ސަރުކާރުން ތަޢާރަފްކުރި 'ރަން ދިހަ ފަހެއް' ސީރީޒްގެ ނޫޓުތަކެވެ. މި ސީރީޒްގައި ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓުތަކެވެ.

'ރަން ދިހަ ފަހެއް' ސީރީޒްގެ ކޮންމެ ނޫޓަކުން ވެސް ރާއްޖޭގެ ގުދުރަތީ ރީތިކަމާއި ކަނޑުފަޅުގެ މުއްސަނދިކަމާއި ތާރީޚާއި ސަގާފަތް ފެންނަން ހުރެއެވެ. އާ 100 ރުފިޔާގެ ނޫޓު ދައުރުކުރަން ފެށުމާ އެކު، ރާއްޖޭގެ ފައިސާގެ ނިޒާމަށް އިތުރު ހަރުދަނާކަމެއް ގެނެސްދޭނެ ކަމަށް އެމްއެމްއޭއިން އުންމީދު ކުރާ ކަމަށް ވެސް ބުނެފައިވެއެވެ.

އެމްއެމްއޭ