ވިއްސާރައަށް ތައްޔާރުވުމަށް ސްޓެލްކޯއިން ޚާއްޞަ ޓާސްކްފޯހެއް އެކުލަވާލައިފި

ކުރިއަށް އޮތް ފަސް ދުވަހު ރާއްޖޭގެ ގިނަ ސަރަހައްދުތަކަށް ވިއްސާރަކުރާނެ ކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް) އިން ލަފާކޮށްފައިވާތީ، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ޚާއްޞަ ޓާސްކްފޯހެއް އެކުލަވާލައިފި އެވެ.

ސްޓެލްކޯއިން "އެކްސް" ގައި ކުރި ޕޯސްޓެއްގައި ބުނެފައިވަނީ ވިއްސާރައަށް ތައްޔާރުވުމުގެ ގޮތުން ފެންބޮޑުވުން ކޮންޓްރޯލް ކުރަން ދުރާލައި ފިޔަވަޅު އަޅަން ނިންމައި، އެ ކުންފުނީގެ މެނޭޖްމަންޓުން މި ޓާސްކްފޯސް އެކުލަވާލާފައިވާ ކަމަށެވެ. މި ހާލަތުގައި އެންމެ އިސްކަމެއް ދެވޭނީ ސްޓެލްކޯގެ ކްރިޓިކަލް އިންފްރާސްޓްރަކްޗަރ ރައްކާތެރިކުރުމަށާއި ރައްޔިތުންނަށް ދެމުންގެންދާ ޔުޓިލިޓީ ޚިދުމަތްތައް މެދުނުކެނޑި ފޯރުކޮށްދިނުމަށް ކަމަށް އެ ކުންފުނިން ހާމަކޮށްފައިވެ އެވެ.

އޭގެ އިތުރުން، ވިއްސާރައިގެ ސަބަބުން ލިބޭ ގެއްލުން ކުޑަކުރަން އާންމުންނަށް އެހީތެރިވުމަށްޓަކައި ސްޓެލްކޯއިން ޚިދުމަތް ދޭ ހުރިހާ ރަށެއްގައި ވެސް އެ ކުންފުނީގެ މުވައްޒަފުން ތައްޔާރަށް ތިބޭނެ ކަމަށް ސްޓެލްކޯއިން ބުނެފައިވެ އެވެ.

މެޓުން ބުނާ ގޮތުގައި ރާއްޖޭގެ އެކި ހިސާބުތަކަށް ގުގުރުމާ އެކު ބޯކޮށް ވާރޭވެހޭނެ އެވެ. އަދި ބުދަ ދުވަހުން ފެށިގެން ހުކުރން ފެށިގެން ހުކުރު ދުވަހާ ހަމައަށް ވައި ގަދަވެ، ކަނޑުތައް ވެސް ގަދަވާނެ ކަމަށް ބެލެވެ އެވެ.

މޫސުން ގޯސްވާނެ ކަމަށް މެޓުން ލަފާކުރުމާ އެކު އެހެން ފަރާތްތަކުން ވެސް އަންނަނީ ސަލާމަތީ ފިޔަވަޅުތައް އަޅަމުންނެވެ. އެގޮތުން ފެންބޮޑުވުމުގެ މައްސަލަ އެންމެ ބޮޑަށް ކުރިމަތިވާ 72 ރަށަށް ވަނީ ޕަމްޕު ފޮނުވާފައެވެ. އަދި މާލޭގައި އާންމުކޮށް ފެން ވަންނަ 56 ގެއެއްގެ ދޮރު ކުރިމަތީގައި ވެލި ބަސްތާ ވަނީ ޖަހާފައެވެ.